Túrkistan oblysy Maqtaaral aýdanynyń sý basqan aimaǵyna QR Premer-Ministriniń orynbasary Roman Skliar bastaǵan úkimettik komissiia bardy, dep habarlaidy primeminister.kz.
Sý basqan aýmaqtardy ushyp aralap shyqqannan keiin, Túrkistan oblysynyń ákimi Ó. Shókeevpen jáne ózbek áriptestermen birlesip, Memlekettik komissiia sý basqan Órgebas jáne Firdoýsi aýyldaryna bardy.
Sonymen qatar Túrkistan oblysy Maqtaaral aýdanynyń aýmaǵyna Ózbekstan tarapynan 100-den astam arnaiy tehnika (shynjyr tabandy jáne dóńgelekti traktorlar, motopompalarmen jabdyqtalǵan órt sóndirý mashinalary) jáne 200 adam jetkizildi, olardyń ishinde gidrotehnika mamandary da bar.
Maqtaaral aýdanyndaǵy jaǵdaimen tanysýǵa QR Premer-Ministriniń orynbasary Roman Skliar kelip, oblys basshysy Ómirzaq Shókeevpen birge sý basqan aýyldardy aralap, eldi meken turǵyndarymen kezdesti. Aqsaqaldarmen sóilesip, turǵyndardyń muń-muqtajyn tyńdaǵan memlekettik komissiia músheleri Myrzakent eldi mekeninde jinalys ótkizdi.
Túrkistan oblysy ákiminiń usynysy boiynsha Memlekettik komissiia sý basqan aýyldardyń ár turǵynyna 100 myń teńgeden ótemaqy tóleý týraly sheshim qabyldady.
Myrzakent tóńireginde Dostyq, Jańa turmys jáne Jeńis aýyldarynyń turǵyndary qonys aýdaratyn jańa shaǵyn aýdan salynady. Jańa turǵyn úi alabyna barlyq kommýnikatsiia jelisi júrgizilip, balabaqshalar men mektepter salynady.
Sý astynda qalǵan eki aýyl — Firdoýsi jáne Órgebas aýyldarynyń azamattaryna oblys ákimi úsh túrli usynys aitty:
-
Basqa eldi mekende úiler salyp, sol jaqqa kóshý;
-
Sýǵa ketken aýyldaǵy úilerin qalpyna keltirý;
-
Turǵyn úiin ózi qalpyna keltirýge niet bildirse, tiisti qarajaty aýdarylady.
Bul úsh usynystyń qaisysyn tańdaý turǵyndardyń óz erikterinde bolmaq, olar ortaq jiynda bir sheshimge kelýi tiis.
Aýyl sharýashylyǵy taýaryn óndirýshiler men mal ustaýshylardyń shyǵyndaryn óteý máselesi de sheshildi. Shyǵyn TJ joiý jónindegi shuǵyl shtab komissiiasy júrgizgen reviziia qorytyndysy boiynsha úkimettik rezervten óteletin bolady.
Aýyl sharýashylyǵy nesieleri boiynsha fermerlerge tólemderdi keiinge qaldyrýǵa múmkindik beriledi.
Aýyl sharýashylyǵy alqaptaryn qalpyna keltirý maqsatynda QR AShM aýyl sharýashylyǵy ǴZI-men birge jerlerdi qalpyna keltiredi jáne biyl qandai daqyldardy otyrǵyzýǵa bolatyny týraly usynystar beriledi.
