Tasqyn kezeńinde «Qazáýequtqarý» mekemesiniń tikushaqtary qyzmet kórsetedi, dep habarlaidy QazAqparat.
Tótenshe jaǵdai ministrliginiń tótenshe jaǵdailardyń aldyn alý departamentiniń bastyǵy Rýstambek Ámrin osylai málim etti.
«Aqmola, Batys Qazaqstan, Shyǵys Qazaqstan, Soltústik Qazaqstan, Qaraǵandy jáne Pavlodar oblystarynda erigen qar sýyn sorý, qorǵaý bógenderin nyǵaitý jáne topyraq salynǵan qaptardy tóseý, ózenderdegi muzdy kesý jumystary belsendi júrgizilýde. Sý tasqyny jaǵdaiyn jedel baqylaý úshin «Qazaqstan Ǵarysh Sapary UK» AQ ǵarysh monitoring derekteri paidalanylady. Ózen basseinderiniń tasqynǵa qaýipti ýchaskelerinde aerovizýaldy zertteý turaqty negizde júrgiziledi», - dedi ol ortalyq kommýnikatsiialar qyzmetinde ótip jatqan brifingide.
Ministrlik ókiliniń aitýynsha, tasqyn maýsymyna órt sóndirý-qutqarý bólimsheleriniń, ishki ister organdarynyń, azamattyq qorǵanys jáne Ulttyq ulan áskeri bólimderiniń jeke quramynan 10 myńnan astam adam men 1,8 myńnan astam tehnika jumyldyrylǵan.
«Sý basý qaýpi az óńirlerden qosymsha rezervtik toptar jasaqtaldy. Olardyń jalpy sany 1047 adam, 121 tehnika, 47 júzý quraly jáne 127 motopompa. Sondai-aq Kókshetaý tehnikalyq institýtynyń jiyntyq jasaǵy men «Qazaviaqutqarý» AQ tikushaqtary joǵary daiyndyqqa keltirildi. Zardap shekken halyqqa palataly lager ornatý úshin TJM jedel rezerviniń múlki men tehnikasy daiyndaldy. Olardy jetkizý jáne ornatý úshin kúshter men quraldar esebi jasaldy», - dedi Rýstambek Ámrin.
