Búgin QR Premer-Ministriniń Birinshi Orynbasary Asqar Maminniń tóraǵalyǵymen aldaǵy sý tasqyny kezeńine daiyndyq máseleleri boiynsha Tótenshe jaǵdailardy eskertý jáne joiý jónindegi vedomstvoaralyq memlekettik komissiia otyrysy ótti, dep habarlaidy "Ult aqparat".
Otyrysqa Komissiia músheleri, memlekettik organdardyń basshylary qatysty. Sharaǵa beinekonferentsiia bailanysy arqyly oblystardyń, respýblikalyq mańyzy bar qalalardyń ákimderiniń orynbasarlary, tótenshe jaǵdailar jónindegi departamentterdiń basshylary qatysty.
QR ishki ister ministri Q. Qasymov «Sý tasqynyn eskertý jáne joiý boiynsha 2017–2020 jyldarǵa arnalǵan sharalar kesheni» Jol kartasyn júzege asyrý týraly aqparat berdi. Sońǵy eki jylda 174 qorǵanys bógeti salynyp, nyǵaityldy, 119 gidrotehnikalyq qurylys, ótkizý qabiletin arttyra otyryp 64 kópir jóndeldi. Jalpy alǵanda, Jol kartasynda 600-den astam is-sharany iske asyrý kózdelgen. TJ departamentterin birtindep materialdyq-tehnikalyq jaraqtandyrýdyń 2018–2020 jyldarǵa arnalǵan jol kartasy ázirlendi.
QR ishki ister ministriniń orynbasary Iu. Ilin basqarý organdarynyń, Memlekettik azamattyq qorǵanys júiesiniń kúshteri men quraldarynyń sý tasqyny qaýipi kezeńine daiyndyǵy týraly baiandady.
Iu. Ilinniń aitýynsha, ortalyq jáne jergilikti atqarýshy organdardyń Jol kartasynyń sharalaryn oryndaýyna turaqty monitoring júrgizilýde. Jahandyq jáne óńirlik aýqymdaǵy tótenshe jaǵdailardy joiý boiynsha is-qimyldar jospary bekitilgen. Aldyńǵy sý tasqyny tájiribesi boiynsha qaýipti ýchaskelerde qutqarý bólimderi qurylýda.
Sonymen qatar, Jol kartasynyń 198 sharasynyń 153-i iske asyrylǵan. Jambyl, Túrkistan, Qyzylorda, Almaty, Qaraǵandy, Pavlodar, Aqtóbe oblystarynda is-sharalar oryndalmaǵan.
Sonymen qatar, otyrysta QR Bas prokýrorynyń orynbasary A. Lýkin, QR energetika vitse-ministri S. Nurlybai, QR aýyl sharýashylyǵy vitse-ministri E. Nysanbaev, QR indýstriia jáne infraqurylymdyq damý vitse-ministri Q. Óskenbaev sóz sóiledi. Olar sý tasqyny kezeńine daiyndyq, tasqyn sýlardyń quiylýyna sý qoimalarynyń tehnikalyq daiyndyǵy, sý tasqynynyń jol jelisi, avtojoldar men temir joldardyń sý basýyn boldyrmaý jónindegi sharalar týraly baiandady.
Buǵan qosa, Almaty, Shyǵys Qazaqstan, Qaraǵandy, Qyzylorda, Pavlodar jáne Túrkistan oblystarynyń ákimderiniń orynbasarlary sý tasqyny kezeńine daiyndyq týraly baiandama jasady.
«Óńirlerde sý tasqyny qaýpin eskertý boiynsha Jol kartasynyń birqatar sharalary oryndalmaǵan», — dedi Premer-Ministrdiń Birinshi orynbasary.
Ol Jol kartasynyń sharalaryn oryndamaý óńirlerde tótenshe jaǵdaidyń týyndaýyna ákeýli múmkin ekenin atap ótti.
«Iesiz gidrotehnikalyq qurylystardyń, sý qoimalarynyń bolýy Qaraǵandy oblysynda oryn alǵandai tótenshe jaǵdailarǵa ákelip soqty. Tasqynǵa qarsy maýsym jaqyn arada bastalady. Jaýapty memlekettik organdar ár óńirdegi iesiz nysandardy kommýnaldyq menshikke berý máselesin erekshe baqylaýǵa alýy tiis», — dedi A. Mamin.
Aýyl sharýashylyǵy ministriniń orynbasary E. Nysanbaevtyń aitýynsha, 2018 jyly anyqtalǵan 49 iesiz nysannan 21-i esepke alyndy, al qalǵan 28-iniń jai-kúii qadaǵalanyp jatyr, biyl olar da esepke alynady.
QR Birinshi Vitse-Premeri A. Mamin barlyq múddeli memlekettik organdarǵa aldaǵy kóktemgi kezeńge arnalǵan boljamdy jáne syn-tegeýrinder taldaýyn eskere otyryp, sý tasqynynyń aldyn alý úshin barlyq qajetti sharalardy qabyldaýdy, halyqty jáne infraqurylymdy sý tasqyny qaýpinen barynsha qorǵaýdy tapsyrdy.
