Foto: Gov.kz
Almaty oblysynyń Balqash aýdanynda keń aýqymdy dalalyq ekspeditsiia ótti. Ony Sý resýrstary jáne irrigatsiia ministrligi men Frantsýz ǵylymi konsortsiýmy, elimizdiń ǵylymi uiymdary jáne jergilikti atqarýshy organdarmen birlesip uiymdastyrdy, dep habarlaidy Ult.kz.
Ekspeditsiianyń maqsaty – Balqash kóli basseinindegi sý resýrstarynyń jai-kúiin keshendi zertteý, onyń ishinde jerústi jáne jerasty sýlarynyń monitoringi, sýarmaly aýyl sharýashylyǵy alqaptaryn taldaý, óńirdiń sý balansyn modeldeý úshin dalalyq derekterdi jinaý jáne tekserý.
Ekspeditsiia quramyna Frantsýz ǵylymi konsortsiýmynyń sarapshylary, Sý resýrstary jáne irrigatsiia ministrligi, Balqash-Alakól basseindik inspektsiiasy, «Qazgidrogeologiia» ulttyq gidrogeologiia qyzmeti, Ý.M. Ahmedsafin atyndaǵy gidrogeologiia jáne geoekologiia institýty jáne «Qazaqmys korporatsiiasy» JShS ókilderi endi.
Mamandar Boiaýly, Bereke, Baqanas, Baqbaqty jáne Birlik aýyldyq okrýgterindegi sýarý júielerin aralap kórdi. Tekserý barysynda aýyl sharýashylyǵy alqaptaryn sýmen qamtý, kanaldardyń tehnikalyq jai-kúii, infraqurylymdy jańartý qajettiligi jáne sý únemdeý tehnologiialaryn engizý máseleleri talqylandy.
Sondai-aq sýdy qaita paidalaný, melioratsiialyq júielerdiń jai-kúii jáne jerasty sýlarynyń deńgeii týraly da aityldy.
Ekspeditsiia qatysýshylary Almaty oblysynyń negizgi sý aidyndaryn, onyń ishinde Qapshaǵai sý qoimasyn, Ile ózeniniń saǵasyn, melioratsiialyq jáne artezian uńǵymalaryn jáne Sorbulaq kólin aralady. Sondai-aq Almatydaǵy jetekshi ǵylymi-zertteý institýttarynda kezdesýler uiymdastyryldy.
«Zertteý qorytyndysy boiynsha memlekettik organdar men múddeli taraptarǵa usynystar qamtylǵan taldamalyq esep daiyndalady. Frantsýz sarapshylarymen birlesip iske asyrylyp jatqan bul joba 2040 jylǵa deiingi boljammen Balqash kólin saqtaý boiynsha master-jospar ázirleýge baǵyttalǵan. Júrgizilip jatqan zertteýler Qazaqstan men Frantsiia arasyndaǵy ekologiia, sý paidalaný jáne ǵylymi almasý salasyndaǵy strategiialyq áriptestikti nyǵaitýǵa baǵyttalǵan mańyzdy qadam», – dedi QR Sý resýrstary jáne irrigatsiia ministrliginiń Sý saiasaty departamenti direktorynyń orynbasary Marat Imanaliev.
Eske salsaq, byltyr jeltoqsan aiynda Sý resýrstary jáne irrigatsiia ministrligi, Frantsiianyń damý agenttigi (AFD) jáne Frantsiianyń Geologiialyq jáne taý-ken zertteý biýrosy (BRGM) arasynda Balqash kóli basseinin birlesip zertteý jáne kóldi saqtaý boiynsha master-jospar ázirleýge grant bólý qarastyrylǵan úshjaqty kelisimge qol qoiylǵan bolatyn.
