Qazaqstanda jaqyn arada patsienttiń donorlyqqa kelisim berýi nemese bas tartýy týraly aqparat barlyq meditsina qyzmetkerlerine qoljetimdi bolatyny týraly habarlamalar tarap jatyr.
Keibireýleriniń pikirinshe, bul meditsinalyq kómek kórsetýdiń sapasyna áser etýi múmkin, óitkeni dárigerler úshin patsientti aýrýdan emdegennen góri, onyń múshelerin alý tiimdirek bolýy múmkin. Bul - jalǵan.
Patsientterdiń ólimnen keiingi donorlyqtan bas tartý nemese kelisý týraly aqparatty elektrondyq densaýlyq pasporttaryna engizý josparlanyp otyrǵandyqtan, keibir azamattar alańdaýshylyq bildirýde.
Olardyń aitýynsha, elektrondy densaýlyq pasporttary áleýetti donorlardyń málimetter bazasyna ainalýy múmkin, sodan keiin dárigerler tizimde kórsetilgenderdi emdeýdi ádeii toqtatady.
QR Densaýlyq saqtaý ministrligi donorlyqqa kelisim berý nemese bas tartý týraly aqparat eldiń barlyq meditsina qyzmetkerleri úshin ashyq jáne qoljetimdi emes ekenin túsindirdi.
«2020 jylǵy 7 shildedegi «Halyq densaýlyǵy jáne densaýlyq saqtaý júiesi týraly» kodekstiń 209-babynyń 8-tarmaǵyna sáikes, aǵzalardyń qaitys bolǵannan keiin donorlyǵyna quqyǵyn bildirgen azamattardyń tirkelimine ýákiletti organ aiqyndaǵan tártippen Transplantattaý jónindegi úilestirý ortalyǵynyń ýákiletti adamdarynyń ǵana qol jetkizýi múmkin bolady», – dep habarlady vedomstvodan.
Sonymen qatar, Kodekstiń osy babynyń 4-tarmaǵyna sáikes, Qazaqstanda adamnan aǵzalaryn májbúrlep alýǵa; adamdy óziniń aǵzasyn berýge májbúrleýge, adamnyń aǵzalary men tinderin satyp alýǵa-satýǵa tyiym salynady. Sondai-aq, Kodeks áreketke qabiletsiz adamdardan, azamattyǵy joq adamdardan, kámeletke tolmaǵandardan jáne qaitys bolǵan kezde jeke basy anyqtalmaǵan adamdardan tinder men múshelerdi alýǵa tyiym salady.
Qoryta aitqanda, ólimnen keiingi donorlyqqa kelisý nemese odan bas tartý týraly derekterdiń jalpyǵa qoljetimdi bolatyny týraly alańdaýǵa negiz joq. Taratylyp jatqan habarlamada QR zańdaryna qaishy keletin aqparat usynylǵan.
