Stepnogor qalalyq PB kriminaldyq politsiia bóliminiń qyzmetkeri kózine burysh spreii shashyraǵanyna qaramastan urylardyń birin qylmys ústinde ustady, dep habarlaidy "Ult aqparat".
Aqmola oblystyq politsiia departamenti baspasóz qyzmetiniń málimetinshe, uryny qylmys ústinde ustaý kórshilerdiń qyraǵylyǵynyń arqasynda júzege asyryldy. Bul týraly mamyrdyń 28-inde Stepnogor qalalyq PB basqarmasynyń kezekshi bólimine habarlandy. Onda turǵyn úidiń kire berisinde kúdikti adamdardyń júrgeni aitylǵan.
«Oqiǵa ornyna jetken tártip saqshylaryn kórgen qylmystyq top músheleriniń biri politseidiń betine burysh spreiin shashyp jiberdi. Alaida, kóziniń kúigenine qaramastan, politsiia qyzmetkeri jedel-tergeý toby kelgenge deiin bir qaskúnemdi ustady», - dedi vedomstvodan.
Kúdikti «páter urysy» retinde esepte turǵan Kókshetaý qalasynyń 37 jastaǵy turǵyny bolyp shyqty.
«Qaskúnemniń eki sybailasy qashyp ketti. Qazirgi ýaqytta olardyń ornalasqan jeri anyqtalýda. Bul joly kúdiktiler kóp qabatty turǵyn úidegi páterlerdiń birinen altyn buiymdar men 300 myń teńge kóleminde aqsha urlamaq bolǵan», - dep tolyqtyrdy vedomstvodan.
