«Spýtnik V» koronavirýsqa qarsy vaktsinasyn júkti áielderge preparattyń ana úshin kútiletin paidasy ishtegi nárestege yqtimal qaýipten joǵary bolǵan jaǵdaida ǵana qoldaný kerek. Preparatqa arnalǵan jańartylǵan nusqaýlyqta osylai delingen, dep habarlaidy "Ult aqparat" TASS-qa silteme jasap.
«Júktilik kezinde «Gam-kovid-vak» preparatyn klinikalyq qoldanýdyń tájiribesi joq. Janýarlarda reprodýktivtik ýyttylyqty zertteý barysynda júktiliktiń ótýine, embriofetaldyq damýyna (analyqtarda) jáne uryqtyń prenataldyq damýyna teris áseri anyqtalǵan joq. Osyǵan bailanysty júktilik kezinde «Gam-kovid-vak» preparatyn kútiletin paida yqtimal qaýipten joǵary bolǵan jaǵdaida ǵana qoldaný kerek», - delingen qujatta.
Alaida, emizý kezinde «Spýtnik V» ekpesin saldyrýǵa bolmaityny aitylǵan. Resei Federatsiiasynyń Densaýlyq saqtaý ministri Mihail Mýrashkonyń sózinshe, vaktsinanyń qaýipsizdigin klinikaǵa deiingi zertteýlerdiń oń nátijelerin, sondai-aq tirkeýden keiingi zertteýler kezinde preparattyń tiimdiligi men qaýipsizdigi týraly derekterdi eskere otyryp, sarapshylar júkti áielderge «Gam-kovid-vak» vaktsinasyn qoldanýǵa qarsy kórsetkishterdi alyp tastaý týraly sheshim qabyldaǵan. Ministr: «Osylaisha koronavirýs infektsiiasynyń aýyr aǵymynyń qaýpi joǵary júkti áielderdi vaktsinalaý múmkindigi ashyldy», - dedi.
