Koronavirýs infektsiiasyna qarsy vaktsina uzaq ýaqyt boiy osy indetti juqtyrý qaýpin joiady.
Qazaqstandyq tilshilerge bergen suhbatynda Reseidegi N.F.Gamaleia atyndaǵy ulttyq epidemiologiia jáne mikrobiologiiany zertteý ortalyǵynyń direktory Aleksandr Gintsbýrg osylai dedi, - dep habarlaidy QazAqparat.
Aleksandr Gintsbýrgtyń aitýynsha, «Spýtnik V» vaktsinasynyń jaǵymsyz áseri kóptegen eldegi ulttyq kúntizbede tizilgen basqa vaktsinalardyń jaǵymsyz áserinen esh erekshelenbeitinin aitady. Onyń bári de preparattyń nusqaýlyǵynda jazylǵan.
«Atap aitqanda bul vaktsinany saldyrǵan adamnyń dene qyzýy bir jarym nemese eki kún boiy 38 gradýsqa deiin kóterilýi múmkin. Ine salynǵan jer de sonsha ýaqyt aýyrsynýy yqtimal. Bulshyq et pen bas aýyrady. Alaida munyń bári de temperatýramen birge joǵalady. Eger adam vaktsinalaýdan keiin ózin jaisyz sezinse, ádettegidei bir tabletka paratsetamol qabyldap, tynyshtalýyna bolady. Mundai jaǵymsyz áserdi jalpy vaktsina alǵandardyń 15-16 paiyzy sezinýi múmkin, qalǵan 85 paiyzy eshqandai jaisyzdyqty sezinbeidi», - dedi ortalyq direktory.
Ol sonymen qatar N.F.Gamaleia atyndaǵy ulttyq epidemiologiia jáne mikrobiologiiany zertteý ortalyǵy koronavirýsqa qarsy vaktsinany 2020 jyly ázirlep qoiǵanyn atap ótti. Sonymen qatar antideneler týraly sóz qozǵaǵan Aleksandr Gintsbýrg adam koronavirýspen aýyryp bolǵan jaǵdai – vaktsinalaýdan keiingi jaǵdaidan múlde bólek ekenin jetkizdi.
«Bul bir-birine múlde uqsamaityn jaǵdailar. Adam koronavirýspen jeńil jaǵdaida aýyrsa, dárigerge júginbeýi múmkin. Alaida mundaida onyń boiyndaǵy antideneler uzaqqa barmaidy. Al adam koronavirýstyń aýyr túrin ótkerse, ókpesi ishinara zaqymdalyp, dene qyzýy kóterilse, onyń boiynda edáýir antidene paida bolady. Biraq keiingi zertteýler kórsetip otyrǵandai, mundai jaǵdaidaǵy adamdardyń 15-16 paiyzynyń aǵzasynda antidenemen birge interferon sekildi beloktar paida bolatynyn kórsetip otyr. Al interferondar antidenelerdi yǵystyrady. Sol sebepti indettiń aýyr túrin ótkergenderde uzaq merzimdi tinder paida bolady deýge kelmeidi. Álemdegi oqiǵalar adamdardyń koronavirýstyń aýyr túrin qaita ótkerýi múmkin ekenin kórsetip otyr», - dedi ol.
Ol sonymen qatar «Spýtnik V» preparatyn 18-den 60 jasqa deiingi adamdarǵa egýge bolady. Alaida qazirdiń ózinde vaktsina synaǵynan 80 jasqa deiingi egde adamdar da ótip jatyr.
Ǵalym sonymen birge ortalyqtyń mamandary antidenelerdi týdyratyn ǵana emes, aǵzadaǵy virýstardyń kóbeiýýine jol bermeitin preparattardy da daiyndap jatqanyn atap ótti. Bul baǵyttaǵy jumys RF Densaýlyq saqtaý ministrliginiń memlekettik tapsyrmasynan keiin bastalady.
