Burynǵy mádeniet jáne sport ministri Arystanbek Muhamediuly bul qyzmettegi óziniń izbasary Aqtoty Raiymqulovany synǵa aldy. Onyń pikirinshe, ol otstavkaǵa ketýi kerek.
Muhamediuly "Jetinshi arnanyń" efirinde Qazaqstan sportshylarynyń Tokio Olimpiadasynda birde-bir altyn medal ala almai, 8 "qolany" qanaǵat tutýyna sebep bolǵan jaittar týraly áńgimeledi, dep jazady Sputnik.
"Olimpiadaǵa bir jyl qalǵanda bizdiń dańqty ministrlikte sportqa jaýapty úsh vitse-ministr aýysty. Eldos Ramazanov jumys istep júrdi, Olimpiadaǵa bir jyl qalǵanda ony shettetip, basqa vitse-ministr Sáken Musaibekovti ákeldi, odan keiin Olimpiadanyń aldynda Erlan Qojaǵapanov taǵaiyndaldy", - dedi eks-ministr.
Ol sondai-aq ministrlikke qarasty sport jáne dene shynyqtyrý komitetiniń basshysy Serik Sápiev Olimpiadaǵa jarty jyl qalǵanda dekrettik demalysqa shyqqanyn eske saldy.
"Árine, ol ózi qalaǵan joq (demalysqa ketýdi - red.), ony jumystan shyǵarǵysy keldi, biraq ol óz quqyǵyn paidalanyp, bir amalyn tapty", - dep málimdedi Muhamediuly.
"Ol jerde sport komiteti tóraǵasynyń orynbasary, tamasha maman Serik Jarasbaev boldy, ómir boiy istegen... Al ony Olimpiadaǵa deiin jumystan shyǵaryp jiberdi. Ádette Olimpiadaǵa bir jyl qalǵanda barlyǵy bir kisidei jumylyp, kózdegen maqsatqa umtylatyn. Onyń ornyna tizgin ustaityndardy aýystyra bastasa, árine, bul sportshylarǵa da, jattyqtyrýshylar quramyna da áser etedi", - dep jalǵastyrdy ol.
Jýrnalist Muhamediulynan Qazaqstan quramasynyń Olimpiadadaǵy nátijesine bailanysty ministrlik basshysy Aqtota Raiymqulova otstavkaǵa ketýi kerek pe dep surady.
"Eger jeńilis bolsa, árqashan moiyndaý kerek. Iá, árine, mindetti (otstavkaǵa ketýge – Sputnik). Bul jerde jai ǵana "iá" nemese "joq" dei salýǵa bolmaidy, solai isteýge mindetti. Jaýapkershilikten qorqýdyń qajeti joq", - dep jaýap berdi eks-ministr.
"Barlyq jaǵdaida jaýapkershilik alý kerek, munda qorqynyshty eshteńe joq. Mysaly Erbolat Dosaevty alaiyq: jer máselesi bolǵan kezde ornynan turyp, prezidentten otstavkaǵa jiberýin surady. Odan ol utylmady, kerisinshe bári "jaraisyń" dep arqasynan qaqty", - dep túiindedi Muhamediuly.
