Qonaev qalasynda boijetkendi óltirip ketti. Bul týraly marqumnyń ápkesi «Nemolchi» qoryna júginip, kómek surap otyr, dep habarlaidy "Ult aqparat" Azattyq Ruhy basylymyna silteme jasap.
Kóz jumǵan boijetkenniń týystary kúdiktiler jaýapkershilikten jaltaryp ketedi dep qorqady.
«Marqumnyń esimi Jannur, ol nebári 18 jasta bolatyn, aspazshy mamandyǵy boiynsha kolledjde oqyp júrgen. Týystarynyń aitýynsha, ólimine kúdikti tórt adam – Qonaev qalasynyń turǵyndary. Olardyń jasy – 18-21 aralyǵynda. Jannur olardyń birimen jaqynda, 7 naýryz kúni tanysqan. Shamamen 14-15 naýryz aralyǵynda aiaýsyz soqqyǵa jyǵyp, óltirip ketken. Týystary keltirgen taǵy bir málimette kúdiktiler boijetkenniń telefony arqyly nesie alyp, qala syrtyna shyǵaryp, soiylmen uryp-soqqany aitylady. Sodan keiin Baqanas baǵytyna qarai dalada ólý úshin qaldyryp ketken. Týystaryna onyń máiiti 21 naýryzda tabylǵanyn habarlady», - dep jazady «Nemolchi» qory.
Úlken ápkesi ony máiithanalardan izdegen. Sebebi qyzdyń denesi qai máiithanada ekenin olarǵa eshkim aitpaǵan. Máiitin tapqanda sińlisiniń denesinde saý jeri joq, azappen óltirilgenin, sondai-aq denesinde bórtpeleri bar ekenin, qolynda bailaýdan qalǵan belgiler qalǵanyn kórgen.
Qonaev politsiiasy kúdiktilerdi ustady. Biraq týystarynyń aitýynsha, ekeýi ustalyp, ekeýi bostandyqta júr.
«Týystary men qoǵam belsendileri qylmyskerler jazasyz qalýy múmkin dep alańdaýshylyq bildirip otyr. Kúdiktilerdiń eki advokaty bar, al marqumnyń jaǵynda eshkim joq», - dep jazady «Nemolchi» qory.
