Sottyń isti qaraýyn barynsha obektivti etýge ekpin qoiylyp otyr. Bul týraly «Qazaqstandaǵy sot júiesiniń reformasy: ozyq halyqaralyq praktikany paidalana otyryp, jańa syn-qaterlerdiń sheshimin tabý» atty dóńgelek ústel otyrysynda QR Joǵarǵy sotynyń tóraǵasy Jaqyp Asanov aitty, dep habarlaidy QazAqparat tilshisi.
«Qylmystyq protsesti shartty túrde úsh satyǵa bólýge bolady: sotqa deiingi tergeý (sotqa deiin bolatyn qadamdar), sottyń isti qaraýy jáne úkimdi oryndaý. Kez kelgen el úshin, qoǵam úshin qylmystyń beti qalai ashylǵany, aiǵaqtar men dálelder qalai jinalǵany mańyzdy. Sonymen qatar, qylmystyq jazalaý men basqa da mindetter qalai oryndalyp jatqany da ózekti», - dedi Asanov.
Onyń aitýynsha, bul protseste sottyń isti qaraýy mańyzdy bolyp qala beredi.
«Qylmystyq protseste únemi sottyń isti qaraýy negizgi býyn retinde bolǵan jáne solai bola beredi de. Iaǵni birinshi instantsiia aiasynda sýdia istiń máni boiynsha qarastyrǵan kezeńdi aityp turmyz. Sondyqtan bizdiń sot aiyptaý paradigmasynan erkin bolýy úshin basty sottyń isti qaraýyn qalaisha barynsha obektivti etýdi talqylamaqpyz. Kezinde keńestik qylmystyq quqyqpen qamtylǵan barlyq elder osy sozylmaly eski muraǵa tap bolyp otyr», - dedi QR Joǵarǵy sotynyń tóraǵasy.
Aita keteiik, is-sharany QR Joǵarǵy soty, EýroOdaq, Eýropa Keńesi jáne Venetsiia komissiiasy uiymdastyryp otyr.
Jiynǵa Qazaqstan men Qyrǵyz Respýblikasy Joǵarǵy Sottarynyń sýdialary, Prezident Ákimshiligi, Parlament, Qaýipsizdik Keńesi, Konstitýtsiialyq Keńes, Ádilet jáne Syrtqy ister ministrlikteriniń, ǵylymi ortanyń, Eýropa Keńesi men Eýro Odaqtyń, halyqaralyq uiymdar men sheteldik zańgerlik qaýymdastyqtyń ókilderi qatysyp jatar.
