Óskemen qalasynda túrme qyzmetkerleri jazasyn ótep jatqan azamatty azaptap óltirip, qylmysty jasyrý úshin ony sýitsid jasaǵandai kórsetken, dep habarlaidy QazAqparat.
Óskemen qalalyq №2 soty baspasóz qyzmetiniń málimetinshe, ShQO boiynsha Qylmystyq-atqarý júiesi departamentiniń 6 qyzmetkerine qatysty QR QK-niń 146-baby 3-bóligine (sottalǵan adamdy azaptap, abaisyzda óltirý) sáikes is qaraldy. Sondai-aq bopsalaý, qyzmet babyn asyra paidalaný arqyly para alǵan A. esimdi azamat sottaldy.
«2019 jyldyń 18 maýsymynda OV-156/2 mekemesiniń qyzmetkerleri aldyn ala sóz bailasyp, jábirlenýshi K.-ny uryp-soqqan. Aýyr dárejedegi dene jaraqatyn alǵan er adam sol jerde kóz jumdy. Óz qylmystaryn jasyrý úshin olar taǵy eki sottalǵandy májbúrlep, máiitti tártiptik izoliator kamerasyna jetkizdi. Politsiia qyzmetkerlerine K-nyń óz-ózine qol jumsaǵandyǵyn aitqan», - delingen aqparatta.
Al A. esimdi túrme qyzmetkeriniń 2018 jyldyń 14 maýsymynda sottalǵan adamnyń anasynan para retinde avtokóliktiń 76 000 teńgelik jazǵy shinalaryn alǵany anyqtaldy. Sondai-aq ol sottalǵandy óz týysynyń úiinde baspaldaq jasaýǵa májbúrlegen.
«Sot úkimimen sottalǵandy óltirgen túrmeniń 6 qyzmetkeri 5, 7 jáne 8 jylǵa bas bostandyqtarynan aiyryldy. Al para alǵan aiyptalýshy 7 jyl merzimge temir torǵa qamaýǵa alyndy. Sottalýshylardyń barlyǵy memlekettik qyzmette jáne quqyq qorǵaý organdarynda jumys isteý quqyǵyn 3 jylǵa joǵaltty», - delingen habarlamada.
