Almaty oblysyndaǵy LA-155/8 mekemesinde sottalǵandardy azaptaǵan qyzmetkerler jaýapkershilikke tartyldy. Bul jaiynda QR IIM resmi ókili Nurdildá Oraz málim etti, dep habarlaidy QazAqparat.
«26 shilde kúni áleýmettik jelilerde Almaty oblystyq qylmystyq-atqarý júiesine tiesili 155/8 mekemesinde jábir kórgen sottalýshylardyń videosy taraǵan bolatyn. Osyǵan bailanysty bul materialdardyń barlyǵyn jiti zerttep, onyń rasymen de sottalýshylarǵa mekeme qyzmetkerleriniń tarapynan qandai da bir kúsh qoldanylǵanyn kórip shyǵyp, osy materialdardy oblystyq prokýratýraǵa joldadyq», - dedi resmi ókil ministrlikte ótken brifingte.
Onyń sózine qaraǵanda, Ishki ister ministriniń tapsyrmasy boiynsha osy máselini egjei-tegjeili tekserý úshin jedel túrde qylmystyq-atqarý júiesinde arnaiy komissiia quryldy.
«Bul turǵyda Qylmystyq-atqarý júiesi komitetinen Almaty oblysyna ókilder jiberildi. 29 shildede tártiptik komissiianyń nátijesi boiynsha, 14 qyzmetker túrli jaýapkershilikke tartyldy. Onyń ishinde jeteýi qyzmetinen bosatyldy. LA-155/8 mekemesi basshynyń eki orynbasary jumystan qýyldy, sondai-aq mekeme basshysy ornynan bosady», - dedi N. Oraz.
N. Oraz osyndai zańsyzdyqtardy boldyrmaýǵa qatysty Ishki ister ministrligi tarapynan naqty sharalar qabyldanatynyn atap ótti.
Budan buryn habarlanǵandai, QR Ishki ister ministrligi Almaty oblysynda koloniiadaǵy zańsyz áreketter beinelengen videony tekseretinin málimdegen bolatyn.
