Qylmystyq-atqarý júiesinde qyzmet atqarý – qaýiptiń ótinde, qaterdiń qasynda júrý degen sóz. Nebir qanquily qylmyskerler shoǵyrlanǵan jerde jaibaraqat júremin degen jái sóz. Oǵan dálel – biren-saran bolsa da sottalǵandardyń qolynan qaza tapqan qylmystyq atqarý júiesiniń qyzmetkerleri bar. Solardyń biri – Aidarbek Sabyrbekov.
Aidarbek Qabylbekuly 1974 jyly 14 jeltoqsanda Almaty oblysy Uiǵyr aýdanynyń Ketpen aýylynda dúniege kelgen. Ol 1994 jyly Otan aldyndaǵy mindetin ótep kelgen soń sol kezdegi Almaty meditsinalyq ýchilishesine túsedi. Ony bitirip mamandyǵy boiynsha birneshe jyl qyzmet atqarǵan ol júrek qalaýymen ishki ister organdaryna kelgen edi. Qylmystyq-atqarý júiesine qarasty túzeý mekemelerinde dáriger mamandyǵy qashanda suranysqa ie mamandyq. Sondyqtan da Aidarbek ishki ister organyna kirýge ótinish jazysymen kóp uzamai Almaty qalalyq Ishki ister basqarmasynyń buiryǵymen LA-155/6 mekemesiniń feldsheri laýazymyna taǵaiyndalady. Bul elimizde qylmystyq ahýaldyń bir kúrdeli kezeńi bolatyn. Ásirese aýyr qylmystar jasaǵany úshin koloniialarda jastar jaǵy basym edi. Tipten kámelettik jasqa tolmaǵan jasóspirimderdiń aýyr qylmysqa barýlary jiilegen kez osy eki myńynshy jyldardyń basy bolatyn desek artyq aitpaimyz. Al, LA-155/6 túzeý mekemesi osyndai jasóspirimder jazasyn óteitin mekeme.
Aidarbek Qabylbekuly ózi qalap kelgen qyzmetine qulshyna kiristi. Árine, basynda erkindiktegidei emes, temir tordyń ar jaǵynda qyzmet atqarý psihologiiasyna biraz salmaq salǵanmen, arada az ǵana ýaqyt ótisimen qylmys degen qaýiptiń quryǵyna ilinip, endi sonyń jazasyn ótep júrgen jasóspirimderdiń densaýlyǵyn baqylaýdy, aýyryp qalǵandaryn emdeýdi bar yntasymen atqaryp, jasóspirimderge janashyrlyq tanytýdan jalyqpady. Osy bir qaǵylez, qandai tapsyrma bolsa da tap-tuinaqtai etip oryndaityn jigitti ujymdaǵylar «Bizdiń dáriger aǵai» dep atap ketip edi. Ókinishke orai ishki qyzmet kishi leitenanty Aidarbektiń ómiri nebári 26 jasynda úzildi.
2000 jyldyń 30 qarashasynda ol qyzmettik mindetin atqarý kezinde saǵat 22.30 shamasynda sottalǵandardyń qashýyn toqtatý barysynda sottalǵan jasóspirimderdiń qolynan qaza tapty. Artynda nebári úsh jastaǵy qyzy Aiaýly men úsh ailyq uly Ulan qaldy.
Árine, Aidarbekti óltirgenderdiń barlyǵy burynǵy jazalaryna taǵy da 10 jyl qosylyp sottalǵanmen jazyqsyz tógilgen qan, mezgilsiz úzilgen ómir, esterin bilmei jatyp jetim qalǵan sábilerdiń taǵdyry, besik taianyp egilgen jarynyń qasireti munymen jeńildegen joq.
A. Sabyrbekovke qaza tapqannan keiin «ishki qyzmet leitenanty» arnaiy ataǵy berildi jáne Qazaqstan Respýblikasy Prezidentiniń Jarlyǵymen «Erligi úshin» medalimen marapattaldy. Ózi qyzmet atqarǵan Almaty qalasyndaǵy LA-155/6 túzeý mekemesiniń aýmaǵynda eskertkish qoiyldy.
Jýyrda biz qazaqtyń «Ornynda bar ońalar» degen sóziniń qasietine taǵy bir ret kóz jetkizdik. Aidarbektiń jubaiy Svetlana Saǵymbaeva beibit kúnniń batyry atanǵan Aidarbektiń artynda qalǵan qyzy men ulyn sanaly etip tárbielep, qatarǵa qosypty. Búginde Aiaýly Aidarbekqyzy joǵary oqý ornynyń stýdenti bolsa, Ulan Aidarbekuly ákesiniń jolyn qýyp QR IIM-niń Sh.Qabylbaev atyndaǵy akademiiasynyń kúndizgi oqý bólimine túsipti. Oqýǵa túskenderdi quttyqtaý rásiminde Akademiia bastyǵy politsiia general-maiory M.Qyzylov Ulanǵa úlken qurmet kórsetip, ári qarai qyzmetin sátti jalǵastyrýǵa tilektestik bildirgenine el riza.
Elimizdiń Táýelsizdik merekesi qarsańynda Aidarbek Sabyrbekovtyń januiasy men týǵan-týystary, áriptesteri taǵy da bir qýanyshtyń kýási boldy. Almaty qalasy Qylmystyq-atqarý júiesi departamentiniń bastyǵy ádilet polkovnigi Manas Jumashuly Tuiaqbaevtyń bastamasymen Departament ǵimaratynyń janynan LA-155/6 mekemesiniń meditsinalyq bóliminiń feldsheri ishki qyzmet leitenanty Aidarbek Qabylbekuly Sabyrbekovke eskertkish ashyldy.
Erligimen áriptesteriniń esinde máńgi qalǵan A.Sabyrbekovtiń eskertkishin ashý saltanatyna «Generaldar keńesi» Respýblikalyq qoǵamdyq birlestigi Prezidiýmynyń tóraǵasy general Rústem Esimhanuly Haidarov, Almaty qalasy Túrik mádeni ortalyǵynyń tóraǵasy, ǵalym, qoǵam qairatkeri Qazaqbai Tashtemiruly Kasimov, Almaty qalasy boiynsha Qazaqstan Halqy Assamlleiasy tóraǵasynyń orynbasary, QR Qarýly kúshteri Ardagerler keńesiniń tóraǵasy Qazbek Mansýrov, Aidarbektiń jary Svetlana, qyzy Aiaýly jáne baýyrlary qatysty.
Saltanatty is-shara barysynda qylmystyq-atqarý júiesine qyzmetke jańadan qabyldanǵan 20 jas maman saltanatty túrde ant qabyldady.
Gúlnár MAǴZUMOVA
