Foto: Aiqyn gazeti
Qazaqstanda balalardy sport sektsiialaryna qabyldaý tártibi ózgerdi, dep habarlaidy "Ult Aqparat" Ulysmedia.kz-ke silteme jasap.
Týrizm jáne sport ministrligi 2024 jylǵy 17 mamyrdaǵy buiryqpen balalar men jasóspirimderge arnalǵan sport sektsiialaryna memlekettik sporttyq tapsyrysty ornalastyrý jáne olardyń jumys isteýi qaǵidalaryna ózgerister engizdi.
Endi sport sektsiiasyna qabyldaý kezegi aqparattyq júiede avtomatty rejimde júrgiziledi. Sondai-aq balanyń jáne zańdy ókiliniń tegi, aty, ákesiniń aty (bar bolǵan jaǵdaida), sport sektsiiasynyń túri, ótinishtiń nómiri men ýaqyty, sekýndtyń úlesine deiin dálme-dál, kezektegi rettik nómirdi qamtityn aqparattyq júie usynǵan málimetter negizinde bólýge arnalǵan oryndardyń tizimin qamtidy. Kezek balalardyń zańdy ókilderiniń bergen ótinishi boiynsha balanyń jas shekteýleri eskerile otyryp, ónim berýshiniń árbir sport sektsiiasy boiynsha jeke qurylady.
Ishki ister organdarynda esepte turǵan deviantty minez-qulyqty balalar basym tártippen aqparattyq júiede tirkeledi. Osy normany qosý arqyly erejeler «Bilim týraly» Zańnyń 47-babynyń 5-1-tarmaǵyna sáikestendirildi.
Budan bólek, túzetýlermen kezektegi pozitsiia zańdy ókilderdiń ótinishti qaitaryp alýyna bailanysty nemese vaýcherdi alý jáne balalardyń kezekten shyǵýy sebebinen kemý jaǵyna qarai jáne osy vaýcherlerdi ónim berýshi keri qaitaryp alǵan balalardyń kezekke oralý sebebi boiynsha ósý jaǵyna qarai jyljýy kózdeledi. Kezekte oryn aýystyrýǵa jol berilmeidi.
Bul túzetýler normativtik quqyqtyq aktini aqparattyq júieniń qoldanystaǵy fýnktsionalyna sáikes keltirý úshin engizildi. Máselen, qazir is júzinde kezekte balanyń jáne zańdy ókiliniń aty-jóni, ótinishtiń berilgen kúni, sport sektsiiasynyń túri, kezektegi rettik nómiri kórsetiledi.
