Sot Talǵarda 18 jastaǵy jigitti qaǵyp óltirgen eks-politseige qatysty shyqqan úkimdi túsindirdi, - dep habarlaidy Massaget.kz Talǵar aýdandyq sotynyń baspasóz qyzmetine silteme jasap.
"Talǵar aýdandyq soty burynǵy politseidi adam ólimine ákep soqqan jol qozǵalysy erejelerin buzyp, jol-kólik oqiǵasy bolǵan jerden ketip qalǵany úshin (QK-nyń 345-baby 3-bóligi jáne 347-baby) kináli dep tanydy. Qylmystyq kodekste bul qylmystar úshin 5 jylǵa deiin bas bostandyǵynan aiyrý jazasy qarastyrylǵan. Bul rette sot jaýaptylyqty jeńildetetin jáne aýyrlatatyn mán-jailardy eskerýi tiis. Jeńildetetin mán-jailar bolǵan jaǵdaida (shyn júrekten ókiný jáne kámeletke tolmaǵan balalarynyń bolýy) sot eń joǵary jazanyń jartysynan astamyn taǵaiyndai almaidy", - dedi sot ókilderi.
Sot aiyptalýshyǵa 5 jylǵa kólik quralyn basqarý quqyǵynan aiyrý jáne 2,5 jylǵa bas bostandyǵynan aiyrý jazasyn taǵaiyndaǵan.
"Aita keteiik, qylmystyń bul túri zań boiynsha aýyr emes qylmys sanatyna jatqyzylǵan, sondyqtan sot raqymshylyq jasaýdy qoldanýǵa mindetti boldy. Sottalǵan adam sottyń qalaýy boiynsha emes, raqymshylyq jasaý týraly zańnyń talaptaryna sáikes bas bostandyǵynan aiyrý túrindegi negizgi jazany óteýden bosatyldy.
Úkim zańdy kúshine engen joq, apelliatsiialyq shaǵym tústi", - dep túsindirdi aýdandyq sot ókilderi.
Eske salaiyq, Talǵarda burynǵy politsei kólikpen qaǵyp ketken soń qaza bolǵan 18 jastaǵy Dinmuhamed Jeńistiń týystary sottalýshyǵa shyǵarylǵan úkimmen kelispeidi. Júrgizýshige eki jarym jylǵa bas bostandyǵyn shekteý jazasy taǵaiyndalǵan.
