Sot úkimimen Atyraý oblysy ákiminiń orynbasary kinásiz dep tanyldy, dep habarlaidy QazAqparat.
Atyraý qalasynyń №2 sotynda Atyraý oblysy ákiminiń orynbasary Qairat Nurlybaevqa (buryn Atyraý oblysy Aýyl sharýashylyǵy basqarmasynyń basshysy bolyp jumys jasaǵan) jáne «Buiyrǵyn» aýylsharýashylyǵy óndiristik kooperativi tóraǵasynyń orynbasary Nurlan Bisembaevqa qatysty QR Qylmystyq kodeksiniń 189-babynyń 4-bóliginiń 2) tarmaǵymen qylmystyq is qaraldy.
«Nurlybaevqa Atyraý oblysy aýyl sharýashylyǵy basqarmasynyń basshysy bola tura, óziniń qyzmet babyn paidalana otyryp, kooperativ tóraǵasynyń orynbasary Bisembaevpen adamdar tobynyń aldyn ala sóz bailasýymen, bótenniń múlkin urlady. Iaǵni AÓK-ǵa investitsiialyq sýbsidiia berý arqyly 83 700 649 teńge jymqyrdy, al, Bisembaevqa kórsetilgen somanyń jartysy 41 900 000 teńgeni iemdengen degen aiyp taǵyldy», -dep habarlady oblystyq sottyń baspasóz qyzmeti.
Sot talqylaýy kezinde aýyl sharýashylyǵy óndiristik kooperativine investitsiialyq sýbsidiia 4 transhpen berilgeni anyqtalǵan. Kooperativtiń investitsiialyq sýbsidiia berý týraly ótinishi jáne saraptama uiymynyń ótinishti maquldaýy sottalýshy Qairat Nurlybaev aýyl sharýashylyǵy basqarmasynyń basshysy laýazymyna taǵaiyndalǵanǵa deiin, iaǵni 2019 jyldyń mamyr aiynyń sońynda alynǵan. Al, qalǵan transhtar boiynsha ótinishter burynǵy basqarma basshysynyń ókimimen qurylǵan jumys tobymen maquldanǵan.
«Tergeý men sottalýshylar arasynda agroónerkásiptik keshen sýbektilerin sýbsidiialaý úshin bólingen aqsha qarajatyn urlaýǵa aldyn ala sóz bailasýdyń bar ekendigine dáleldemeler usynylǵan joq. Sotta zerttelgen dáleldemelermen investitsiialyq sýbsidiialar berý týraly ótinishke qosa berilgen qujattardyń tolyqtyǵy úshin AÓK qujattaryn qabyldaǵan bólim basshylary jaýapty ekeni anyqtaldy. Saraptama uiymy jáne jumys tobymen obektiniń óndiristik qýattarynyń sáikestigin tekserý aktisi jasaqtalyp, basshy – sottalýshy Q.Nurlybaevqa usynylǵan. Sonyń negizinde ol sýbsidiia berýge arnalǵan shartqa qol qoiǵan. Sot otyrysynda jaýaptalǵan Aýyl sharýashylyǵy ministrliginiń mamany jumys toby nemese saraptama uiymymen kelisim berilgennen keiin basqarma basshysy shartqa qol qoiýǵa mindetti ekenin, eger qol qoimaǵan jaǵdaida ol jaýapqa tartylatynyn aityp kórsetken.
Sottalýshy N.Bisembaev AÓK-de materialdyq jaýapty tulǵa bolyp tabylmaidy. Alǵashqy úsh sýbsidiiany alý kezeńinde AÓK-de jumys jasamaǵan jáne quryltaishysy bolmaǵan. Ol 2020 jyldyń 3 tamyzynda direktordyń orynbasary bolyp jumysqa ornalasqan. Iaǵni úshinshi transh sýbsidiiasy alǵannan keiin jumysqa ornalasqan jáne onymen materialdyq jaýapkershilik týraly shart jasalmaǵan», -dep málim etti sottyń baspasóz qyzmeti.
Aýylsharýashylyǵy óndiristik kooperativi tóraǵasynyń ótinishimen ol Atyraý qalasynda qus fabrikasynyń qosymsha obektilerin salý úshin sharýashylyq shotynan alynǵan, sýbsidiia retinde túsken aqshalai qarajatqa qurylys materialdaryn satyp alýǵa kómek kórsetken. Bul jaǵdaidy kooperativ ókilderi rastaǵan. Sottalýshylar investitsiialyq qarajatty iemdenbegen. Atalǵan qarajatty aýylsharýashylyǵy óndiristik kooperativi igergen.
«AÓK-ke tiesili qus fabrikasy jumys isteidi. Salyqtardy ýaqtyly tóleidi. Aýditorlyq tekserý sýbsidiia berý rásimin anyqtaǵannan keiin 83 700 649 teńge kóleminde berilgen sýbsidiia tolyǵymen biýdjetke qaitaryldy. Qazirgi ýaqytta AÓK-niń azamattyq talap boiynsha bereshegi joq. Prokýror Q.Nurlybaevqa 10 jyl, Bisembaevqa 7 jyl merzimge bas bostandyǵynan aiyrý jazasyn taǵaiyndaýdy surady. Jábirlenýshiniń ókili keltirilgen ziiannyń tolyq ótelgenin aityp kórsetti. Sottalýshylar men qorǵaýshylar qylmys quramynyń bolmaýyna bailanysty aqtaýdy surady. Sot sottalýshylar Q.Nurlybaev pen N.Bisembaevtyń áreketterinde qylmys quramynyń bolmaýyna bailanysty olardy kinásiz dep tanydy», -dep habarlady oblystyq sottyń baspasóz qyzmeti.
Sot úkimi zańdy kúshine engen joq.
