Elordadaǵy opera jáne balet teatrynda ornalasqan sailaý ýchaskesinde daýys bergen Qazaqstannyń Tuńǵysh Prezidenti Nursultan Nazarbaev nemere inisi Qairat Satybaldyuly úkiminiń ádildigi týraly suraqqa jaýap berdi, - dep habarlaidy "Ult aqparat".
"Sot sheshimi ádil boldy dep oilaimyn. Ádil bolmady dep esepteitin adam shaǵym bersin. Kez kelgen jaǵdai sot arqyly sheshiledi", - dedi Nazarbaev tilshiler suraǵyna jaýap berip.
Eske sala keteiik, Qairat Satybaldyuly biyl naýryz aiynda qyzmet babyn asyra paidalandy jáne Qazaqtelekom AQ-tyń qarjysyn iri kólemde jymqyrdy degen kúdikpen ustalǵan bolatyn.
Qyrkúiek aiynda Satybaldyuly kinásin moiyndap, TsTS pen Qazaqtelekom kompaniialaryna 12 milliard teńge jáne 28 milliard teńge múliktik shyǵyndy ótegen.
Keiin sot sheshimimen Qairat Satybaldyulyna 6 jylǵa bas bostandyǵynan aiyrý jazasyn ortasha qaýipsizdik mekemesinde óteý týraly úkim shyǵaryldy. Sonymen qatar sot múlkin tárkileýdi, prezidenttiń atyna ony general-maior sheninen, Qurmet jáne Parasat ordenderinen aiyrý týraly ótinishhat joldaýdy, sondai-aq memlekettik qyzmette, ulttyq kompaniialarda, Ulttyq bankte 10 jyl merzimge laýazymdardy atqarýǵa tyiym salý týraly qaýly shyǵardy.
Buǵan qosa, Sybailas jemqorlyqpen kúres agenttiginiń málimetinshe, sotqa deiin Satybaldyuly jáne basqa da tergeýdegiler memleketke taǵy 240 milliard teńge qaitarǵan.
