Barshańyzǵa málim, sottar qashyqtyqtan jumys isteýde. Buǵan Joǵarǵy Sottyń tsifrlyq tehnologiiany qarqyndy engizýi múmkindik berdi.
Bul el azamattary úshin tiimdi ári paidaly bola túsýde. Nege?
Birinshiden, qazir kópshilik úilerinde. Sondyqtan azamattar qandai ótinish bolsyn, sotqa elektrondy túrde berýdi jón kóredi.
Ekinshiden, qaǵazbastylyqtan arylýǵa jaqsy sebep. Qarajat shyǵyndamaidy. Ýaqyt únemdeidi.
Úshinshiden, sotqa qatysty barlyq sharýany da elektrondy túrde bitirýge múmkindik mol.
Joǵarǵy Sot janyndaǵy Sottardyń qyzmetin qamtamasyz etý departamentiniń basshysy Nail Ahmetzakirov: "Biz karantin kezinde de el azamattarynyń konstitýtsiialyq quqyqtaryn sottar arqyly qorǵaý úshin IT-tehnologiiany keńinen qoldanýdamyz. Respýblika sottarynda tsifrlandyrý isi naqty júrýde. Mysaly, azamattyq isterdiń 91 paiyzy elektrondy túrde sottarǵa kelip tústi. Sot aktileriniń 6,5 mln.-nan astamy internet júiesi arqyly qoljetimdi", - deidi Nail Ahmetzakirov.
Qazir kópshilikke "Sot kabineti" servisi keńinen tanymal. Mysaly, «Smart-sot» jáne «Sot tóreliginiń jeti túiini» baǵdarlamalary aiasynda «Onlain-tatýlasý», «Sot aktileriniń zańdylyǵyn tekserý» jáne «Sot isteri men materialdarynyń bolýyn tekserý» servisteri jumys istep tur.
«Sot kabineti» arqyly elektrondy ótinishter respýblika sottaryna túsedi. Bul arqyly ótinish ieleri hattyń tirkeý nómiri, sot otyrysynyń ótetin ýaqyty, t.b. málimetterdi qysqa merzimde alady.
Qazirgi ýaqytta sottar jumysy 100 paiyz elektrondy formatqa kóshirilgen. Mundai jumystyń jańa formaty dál qazirgidei karantin ýaqytynda óz tiimdiligin kórsetýde. Bailanys arnalarynyń (TrueConf, Skype, WhatsApp t.b.) múmkindikteri de artýda.
Qoryta aitqanda, azamattardyń densaýlyǵy men ómirine qaýip tónbes úshin jáne konstitýtsiialyq quqyǵyn qorǵaý úshin sottar barlyq jaǵdaidy jasaýda.
