video kadry
Elordada aiyqpas dertke shaldyqqan naýqastardy qorlaǵan stýdenttiń isi boiynsha sot úkimi shyǵaryldy, dep habarlaidy "Ult aqparat" Astana sottarynyń resmi paraqshasyna silteme jasap.
Tergeý materialdaryna sáikes, ońaltý ortalyǵynyń sanitary dármensiz kúidegi úsh patsientti qinady dep aiyptaldy (QK 110-baby 2-bóliginiń 1, 2-tarmaǵy).
Jas jigit hospiste sanitar jáne ońaltý ortalyǵynda jattyǵý terapiiasynyń nusqaýshysy bolyp jumys istei otyryp, fizikalyq jattyǵýlar kezinde egde jastaǵy jáne kámeletke tolmaǵan naýqastardy júieli túrde uryp-soǵyp, azaptaǵan.
"Sottalýshynyń kinási beinejazbalarmen, jábirlenýshiler men kýágerlerdiń aiǵaqtarymen dáleldendi.
Prokýror ony 4 jyl 8 aiǵa bas bostandyǵynan aiyrýdy surady. Al qorǵaýshy tarap bas bostandyǵynan aiyrýǵa bailanysty emes jaza taǵaiyndaýdy surady. Jábirlenýshiler bolsa zańǵa sáikes jaza taǵaiyndaýdy jáne moraldyq ziiandy óteýdi surady" - delingen habarlamada.
Sot aiyptalýshynyń kináni moiyndaýyn jáne shyn júrekten ókinýin qylmystyq jaýaptylyq pen jazany jeńildetetin mán-jailar retinde tanyǵan. Al aýyrlatatyn mán-jailar anyqtalmaǵan.
"QK 110-baby 2-bóliginiń sanktsiiasy 4 jyldan 7 jylǵa deiin bas bostandyǵyn shekteý nemese aiyrý túrindegi jazany kózdeidi.
Sot sottalýshyny azaptaý faktisi boiynsha kináli dep tanyp, 4 jyl 8 aiǵa bas bostandyǵynan aiyrdy. Jábirlenýshilerdiń paidasyna 2 mln teńge kóleminde moraldyq ziiandy óteý somasy óndirildi" - delingen habarlamada.
Sot úkimi zańdy kúshine engen joq.
Nájisti jeýge májbúrledi
Adam nanǵysyz sumdyq jaǵdai jergilikti hospista bolǵan. Onda taǵdyrynan teperish kórip aiyqpas dertpen kúresip jatqan naýqastar jatady. Sol jerde taǵylymdamadan ótken stýdent jigit patsientterdi basynan urǵan, qolymen nuqyǵan, eń soraqysy, múgedekterdiń jórgekterin ashyp, ondaǵy nájisti jeýge májbúrlegen.
Ólimmen arpalysyp jatqandardyń basyna paket kigizgen, odan qalsa, jerge jatqyzyp tepken. Sonyń bárin videoǵa túsirip, jora-joldastary otyratyn arnaiy chatqa jiberip otyrypty.
Al dostary baibalam salýdyń ornyna, kerisinshe qoldap-qolpashtap, áleýmettik jelige taratyp jibergen.
Hospis basshylyǵy jelide jeldei esken videodan keiin dárigersymaqty birden jumystan shyǵaryp jiberipti. 21 jastaǵy stýdent kishipeiil bolyp kóringen, naýqastardyń ishi-baýyryna kirip turǵan.
Paleativti ortalyqtan ońai qutylǵan stýdent-dáriger ozbyrlyǵyn basqa klinikada jalǵastyrǵan. Munda da taǵdyry onsyz da mańdaiynan sipamaǵan balalardy uryp-soqqan. Tipti seksýaldyq sipattaǵy qorlyq kórsetipti.
10 otbasy stýdenttiń ústinen shaǵym túsirgen. Biraq sot otyrystary bir jylǵa sozylyp ketti. Osy ýaqyt ishinde derti dendegen beseýi o dúnielik bolǵan.
