Shýche-Býrabai kýrorttyq aimaǵyndaǵy kóldi tazartýǵa bólingen biýdjet aqshasyn jymqyrdy dep aiyptalǵan burynǵy energetika vitse-ministrleri Ǵani Sádibekov pen Baqytjan Jaqsalievtiń isi boiynsha úkim jariialandy. Sot sottalýshylardy is boiynsha kináli emes dep tanydy, dep habarlaidy Sputnik Qazaqstan.
Is boiynsha protsess Nur-Sultan qalasynyń "Baiqońyr" aýdanynyń №2 sotynda ótti. Isti sýdia Kemeńger Imashev qarady.
"Sot Baqytjan Jaqsalievti, Ǵani Sádibekovti qylmystyq kodekstiń 189-baby 4-bóliginiń 2-tarmaǵyndaǵy qylmystyq quqyqbuzýshylyq boiynsha kinásiz dep tanyp, áreketterinde qylmystyq quqyqbuzýshylyq quramy bolmaǵany úshin aqtady", - dedi úkimdi oqyǵan sýdia Kemeńger Imashev.
© Sputnik / Abzal Kaliev
Sondai-aq, sot Jan Nurbekov, Dáýren Dýanbek, Bekzat Qadyrberlin, Serik Jumalinov, Berden Jarkenov, Nurlan Ǵarifolla siiaqty basqa da sottalýshylardy aqtady. Sádibekov pen Jaqsaliev Shýche-Býrabai kýrorttyq aimaǵyndaǵy Qarasý kólin tazartý barysynda asa iri mólsherde senip tapsyrylǵan bóten múlikti iemdengeni nemese ysyrap etkeni úshin aiyptalǵan bolatyn. Ekeýiniń de isine "Aimaq" JShS merdigerlik uiymynyń qatysy bolǵan.
2021 jyly 6 qazanda qylmystyq is boiynsha jaryssóz bastaldy. Onda prokýror Jaqsalievti kináli dep tanýdy jáne memlekettik qyzmette jumys atqarý quqyǵynan ómir boiyna aiyra otyryp, segiz jylǵa bas bostandyǵynan aiyrýdy surady. Memlekettik aiyptaýshy Sádibekovtiń múlkin tárkilep, ómir boiy memlekettik qyzmette isteý quqyǵynan aiyra otyryp, 10 jylǵa sottaýdy surady.
Burynǵy eki vitse-ministrden bólek, taǵy alty adamnyń áreketi qaraldy. Tergeý málimetinshe, olar qylmystyq shemaǵa qatysqan.
Burynǵy vitse-ministrler isi
Burynǵy energetika vitse-ministrleri Ǵani Sádibekov pen Baqytjan Jaqsaliev 2018 jyly biýdjet qarajatyn jymqyrdy degen kúdikke ilindi.
Sádibekov pen Jaqsaliev soty 2019 jyldyń jeltoqsan aiynda bastaldy. Biraq zańbuzýshylyqtardy joiý úshin is prokýrorǵa qaitaryldy. 2021 jyly 21 maýsymda aldyn ala tyńdaý ótti, sodan keiin is Nur-Sultan sotyna qaitaryldy. Jańadan alynǵan saraptama nátijelerin eskere otyryp, urlanǵan aqsha somasy 778 million teńgege deiin azaidy.
