Sot Qyrǵyzstannyń burynǵy prezidenti Almazbek Atambaevty Memlekettik UQK tergeý izoliatorynda 26 qazanǵa deiin qaldyrý týraly sheshim shyǵardy, dep habarlaidy Kabar agenttigi.
Sheshim Bishkektiń Pervomai aýdandyq soty sýdialarynyń búgin ótken kóshpeli otyrysynda qabyldandy.
Eske sala keteiik, Qyrǵyzstannyń burynǵy prezidenti birneshe bap boiynsha aiyptalyp otyr. Atap aitqanda, Atambaev: Bishkek jylý energiia stansasyn jańǵyrtý kezinde sybailas jemqorlyqqa jol berdi, Bishkek jylý energiia stansasyna kómir jetkizýde sybailas jemqorlyqqa jol berdi, zańsyz jolmen tabystaryn arttyrdy («Forým» ǵimaraty isi), Geologiia agenttiginiń jekelegen laýazymdy tulǵalarymen birge litsenziia berý boiynsha sybailas jemqorlyqqa jol berdi degen kúdikke ilikken.
Budan bólek, bas prokýror Otkýrbek Djamshitov Atambaev qarý qoldaný, jappai tártipsizdik uiymdastyrý, tergeýge kedergi jasaý, adamdardy kepilge alý, adam óltirýdi uiymdastyrý, adam óltirýge áreket jasaý baptary boiynsha kúdikke ilingen málimdegen.
Qyrǵyzstannyń memlekettik ulttyq qaýipsizdik komitetiniń tóraǵasy Orozbek Opýmbaev Qyrǵyzstannyń burynǵy prezidenti Almazbek Atambaev tóńkeris jasamaqshy boldy degen edi.
Qazir tergeý amaldary júrip jatyr.
