Ótken jyly Soltústik Qazaqstan oblysyna basqa óńirlerden 725 otbasy qonys aýdarǵan, dep habarlaidy "Ult aqparat".
Oblys ákiminiń orynbasary Asqar Saqypkereev brifingte atap ótkendei, qonys jańartqandardyń teń jarymy – eńbekke qabiletti jandar. Onyń 73 paiyzy turaqty jumysqa ornalastyrylǵan.
Úkimet basshysynyń orynbasary Berdibek Saparbaevtyń óńirge sapary kezinde oblys basshylyǵy kóshi-qon baǵdarlamasyn iske asyrýdaǵy problemalardy aitqan. Onyń biri – kóship kelýshilerdiń biliktiligi. Bul másele tek Soltústik Qazaqstan ǵana emes, basqa da qabyldaýshy aimaqtarda bar. Sol kezde A. Saqypkereev óz azamattaryn basqa óńirge attandyratyn aimaqtarǵa olardy qabyldaýshy jaqtyń suranysyna sáikes irikteý jáne bilikti maman etip oqytý jaýapkershiligin júkteýdi usyndy.
«Qonys aýdarýshylardyń otbasyn jumysqa turǵyzýǵa, baspanamen qamtýǵa, mektepke jáne balaqshaǵa ornalastyrýǵa kómek kórsetilip otyr. Kásipkerlikpen, baqsha ósirýmen ainalysqysy keletinderge tiisti jaǵdai jasalýda. Atap aitqanda jer telimi berilip, qaitarymsyz grant alýyna qoldaý kórsetiledi», - deidi oblys ákiminiń orynbasary.
Olardy baspanamen qamtý úshin óńirde qanatty joba iske asyrylyp jatyr. Ótken jyly bes tiptik joba aiasynda 428 úi turǵyzyldy. Ár úidiń aýmaǵy – 90 sharshy metrge deiin. Aldaǵy úsh jylda taǵy osyndai 2100 úi salynady degen jospar bar.
«Jalpy alǵanda bul baǵdarlama migratsiialyq protsesterdi turaqtandyryp, jalpy bilim beretin mektepter jelisin saqtaýǵa, aýyldaǵy vakansiialardy toltyrýǵa múmkindik beredi. Ásirese ustazdar men dárigerler, aýyl sharýashylyǵynda - agronomdar, mehanizatorlar men veterinarlar tapshylyǵynan qutylamyz», - dep atap ótti A. Saqypkereev.
Jalpy, baǵdarlama bastalǵan 2016 jyldan beri Soltústik Qazaqstan oblysyna 5 myńǵa jýyq adam nemese 1428 otbasy kóship kelgen.
