Sońǵy tórt jylda elimizde tótenshe jaǵdai, tabiǵi jáne tehnogendik sipattaǵy oqiǵalar saldarynan 9 047 adam zardap shekti. Bul týraly Májilis tóraǵasynyń orynbasary, depýtat Balaim Kesebaeva málim etti, dep habarlaidy QazAqparat tilshisi.
«Ókinishke qarai, dúlei apattar jyl saiyn álemde qanshama adamyń ómirin alyp, densaýlyqtary men kúndelikti tirligine áser etýde. Qazaqstan da tótenshe jaǵdailardyń týyndaýynyń, olardyń áleýmettik salaǵa jáne qorshaǵan ortaǵa teris áseriniń jalpy álemdik zańdylyqtarynan tys qala almaidy. Qorshaǵan ortaǵa antropogendik áserdiń joǵarylaýy jáne eldiń belsendi indýstriialyq damýyna bailanysty teris faktorlar tehnogendik tótenshe jaǵdailardyń týyndaýyna alyp keledi. Tek sońǵy 4 jylda respýblika aýmaǵynda 56 783 tótenshe jaǵdai men tabiǵi jáne tehnogendik sipattaǵy oqiǵalar tirkeldi. Olardyń saldarynan 9 047 adam zardap shekti, onyń ishinde 2 875 adam qaza tapty. Materialdyq zalal 19,4 mlrd teńgeni qurady», - dedi B. Kesebaeva Májilistegi «Azamattyq qorǵaý júiesin damytý týraly» taqyrybyndaǵy Úkimet saǵatynda.
Onyń aitýynsha, atalǵan jaǵdailarda azamattarymyz óz qaiǵy-qasiretimen jalǵyz qalǵan joq. Memleket zardap shekken halyqqa qoldaý kórsetý jáne tótenshe jaǵdailardyń saldaryn joiý máselelerine erekshe kóńil bóledi. Bul úshin Úkimet pen jergilikti atqarýshy organdardyń rezervterinde jyl saiyn qarjylai qarajat kózdelip, memlekettik materialdyq rezervtiń resýrstary paidalanylady.
«Mundai jaǵdailarda azamattyq qorǵaý júiesin odan ári damytý halyqtyń qaýipsizdigin jáne eldiń ekonomikalyq áleýetin qamtamasyz etýdiń asa mańyzdy sharty bolyp sanalady. Sonymen birge, planetamyzdaǵy klimattyń jahandyq ózgerýi azamattyq qorǵaýdyń memlekettik júiesiniń jumys isteý qaǵidattary men tetikterin zaman talabyna sáikes qaita qaraý qajettiligin týdyrady. Budan basqa, azamattyq qorǵaý salasyndaǵy problemalar tótenshe jaǵdailardyń aldyn alý jáne olardyń saldaryn joiý jónindegi tiimdi qyzmetti qiyndatady», - dedi depýtat.
