Sońǵy aptada koronavirýstyń simptomsyz jaǵdailary 65 paiyzǵa artty. Bul týraly Úkimet otyrysynda QR Densaýlyq saqtaý ministriniń mindetin atqarýshy Lázzat Aqtaeva aitty, dep habarlaidy QazAqparat.
«Qazaqstanda koronavirýspen aýyrǵan 23 960 naýqas tirkelgen. Onyń ishinde 16 351-i simptommen jáne 7 609-y simptomsyz. 13 716 naýqas emin jalǵastyrýda. 10 139 naýqas saýyǵyp shyqty, 105 naýqas qaitys boldy. Búgingi kúni testileý qýaty 28 myńǵa deiin jetkizildi. Barlyǵy KVI-ǵa 1 271 471 test júrgizildi. Qazaqstanda 1 KVI jaǵdaiyna 78 testten keledi. Bul Resei, AQSh, Italiia, Kanada, Aýstriiadaǵy testileý deńgeiinen joǵary, 100 myń turǵynǵa shaqqanda test sany 6824-ti quraidy», - dedi ol.
Onyń atap ótýinshe, qazirgi ýaqytta testileý epidemiologiialyq kórsetilimder boiynsha, profilaktikalyq maqsatta jáne epidemiologiialyq qadaǵalaý aiasynda júrgiziledi. Bas memlekettik sanitariialyq dárigerdiń qaýlysyna sáikes zerthanalyq tekserýge: naýqastar men virýs tasymaldaýshylar, JRVI, tumaý, pnevmoniiamen aýyratyn naýqastar, naýqastarmen bailanysta bolǵan adamdar, statsionarlar men meditsinalyq-áleýmettik mekemelerge jatqyzylǵan adamdar, meditsina qyzmetkerleri, áskerge shaqyrylýshylar, QR aýmaǵyna keletin adamdar jatady.
«COVID-19-ǵa PTR-testileý úshin 56 zerthana jumys isteidi, testileý qýaty táýligine 28 000-ǵa deiin jetkizildi. Bas memlekettik sanitariialyq dárigerdiń qaýlysymen aiqyndalǵan testileýge jatatyn halyqty testileýmen qamtýdy qamtamasyz etý maqsatynda biýdjet esebinen qýatty táýligine 30 000 testke deiin, al memlekettik jáne jeke sektor zerthanalar qýaty esebimen jalpy el boiynsha táýlikke 35 myńǵa deiin arttyrý josparlanýda»,- dedi Lázzat Aqtaeva.
Onyń dereginshe, sońǵy aptada respýblikada 5 485 jaǵdai tirkeldi. Ótken aptamen salystyrǵanda syrqattanýshylyq 1,9 ese ósken. Aýrý jaǵdailarynyń jalpy sanynyń 44 paiyzy bailanysta bolǵan adamdar arasynda tirkelgen, 36 paiyzy kásiptik tekserý júrgizý kezinde anyqtaldy, 19 paiyzy JRVI-men aýyrǵan patsientter arasynda, ákelingen jaǵdai – 1 paiyz.
«Bul rette, aýrý simptomdary bar jaǵdailardyń sany 1,3 ese ósken jáne aýrý juqtyrýdyń jalpy sanynyń 35,5 paiyzyn, al simptomsyz jaǵdai 65 paiyzyn qurady»,- dedi ol.
