Sońǵy aptada koronavirýsqa shaldyqqan naýqastar sany 12 paiyzǵa artty. Bul týraly QR Densaýlyq saqtaý vitse-ministri – bas memlekettik sanitar dáriger Erlan Qiiasov aitty, dep habarlaidy "Ult aqparat".
«17 naýryzdaǵy jaǵdai boiynsha Qazaqstanda COVID-19-ǵa oń nátijemen 226 767 naýqas, al KVI-diń teris nátijesimen 49 896 jaǵdai tirkeldi. KVI ońnan 208 074 jáne KVI teristen 45 428 naýqas saýyǵyp shyqty. Aqpanda qańtarmen salystyrǵanda naýqastar sany 30 paiyzǵa tómendegeni baiqaldy. Sonymen qatar sońǵy 5 kúnniń ishinde táýligine 1 myńnan astam jaǵdai anyqtaldy. Sońǵy aptada aldyńǵy aptamen salystyrǵanda naýqastar sany 12 paiyzǵa ósýi baiqalady», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, Qazaqstan táýekeli tómen nemese jasyl aimaqtan táýekeli ortasha aimaqqa, iaǵni sary aimaqqa aýystyryldy.
«Qyzyl aimaqta 3 óńir - Nur-Sultan men Almaty qalalary jáne Batys Qazaqstan oblysy tur. Sary aimaqta Almaty, Aqmola, Atyraý, Qaraǵandy oblystary ornalasqan. Qalǵan oblystar jasyl aimaqta», - dedi Erlan Qiiasov.
