Sońǵy 5 jylda aýyldarda ekonomikanyń negizgi kórsetkishteri boiynsha oń dinamika baiqalady. Bul týraly Úkimet otyrysynda QR Ulttyq ekonomika ministri Áset Erǵaliev aitty, dep habarlaidy QazAqparat.
«Aýyldyq jerlerdegi ómir súrý deńgeiin arttyrý maqsatynda Ulttyq ekonomika ministrligi aýyldyq aýmaqtardy damytý boiynsha belsendi jumystar júrgizýde. Búgingi kúni aýyl halqynyń sany 7,7 mln adamdy nemese elimiz boiynsha halqymyzdyń jalpy sanynyń 41 paiyzyn qurady. Jumyspen qamtylǵan aýyl halqynyń qurylymynda aýyl sharýashylyǵy eń úlken úlesti quraidy. Bul - 28,2 paiyz. Jalpy sońǵy 5 jylda ekonomikanyń negizgi kórsetkishteri boiynsha oń dinamika baiqalady», - dedi ol.
Onyń atap ótýinshe, aýyldarda ómir súrý deńgeiin odan ári arttyrý úshin ministrlik «Aýyl – el besigi» jobasyn iske asyrý boiynsha josparly jumystar júrgizýde. Jobanyń maqsaty - infraqurylymdardy jańǵyrtý esebinen jáne ony jańa óńirlik standarttar parametrlerine deiin jetkize otyryp,aýyl turǵyndarynyń ómir súrý sapasyn jaqsartý.
«Atalǵan maqsatqa jetý áleýmettik jáne injenerlik infraqurylymdardy damytý, aýyl turǵyndarynyń áleýmettik igilikterge qol jetimdiligin qamtamasyz etý boiynsha mindetterdi iske asyrý esebinen, sondai-aq qolaily ómir súrý ortasyn qalyptastyrý arqyly júzege asyrylady», - dedi ol.
