Jańa oqý jylynan bastap Soltústik Qazaqstan oblysynda Kúlásh Baiseiitova atyndaǵy Qazaq ulttyq óner ýniversitetiniń ókildigi jumysyn bastaidy, dep habarlaidy ult.kz.
Joba Qazaqstan Respýblikasy Mádeniet jáne aqparat ministrliginiń qoldaýymen júzege asyrylmaq. Bastamanyń negizgi maqsaty – óńirdegi daryndy jastarǵa sapaly shyǵarmashylyq bilim alýǵa múmkindik berý jáne olardyń kásibi áleýetin damytý.
Ýniversitet ókilderiniń málimetinshe, jańa ókildik óńir jastarynyń óner salasynda bilim alýyna qolaily jaǵdai jasap, shyǵarmashylyq qabiletin shyńdaýǵa jol ashady.
Búginde Kúlásh Baiseiitova atyndaǵy Qazaq ulttyq óner ýniversiteti mýzyka, teatr, beineleý óneri, kino jáne teledidar, art-menedjment sekildi baǵyttar boiynsha mamandar daiarlaityn elimizdegi jetekshi joǵary oqý oryndarynyń biri sanalady. Ýniversitettiń stýdentteri men túlekteri halyqaralyq baiqaýlar men festivalderde Qazaqstannyń namysyn qorǵap, ulttyq mádeniettiń damýyna úles qosyp keledi.
Ókildik arqyly talapkerler «Óner jáne gýmanitarlyq ǵylymdar» baǵyty boiynsha teatr óneri, beineleý óneri, vokal óneri, dástúrli mýzyka óneri, estrada óneri, sondai-aq kino jáne teledidar rejissýrasy mamandyqtaryna túse alady.
2026–2027 oqý jylyna qujat qabyldaý jáne talapkerlerge keńes berý jumystary 20 maýsym men 6 shilde aralyǵynda Astana qalasyndaǵy ýniversitet bazasynda júrgiziledi. Al qabyldaý emtihandary 7 shildede bastalady.
Mamandardyń pikirinshe, Soltústik Qazaqstan oblysynda ýniversitet ókildiginiń ashylýy óńirdegi shyǵarmashyl jastardyń kásibi bilimge qoljetimdiligin arttyryp, mádeniet pen óner salasynyń damýyna oń áser etedi.
