Búgin Senattyń jalpy otyrysynda izdeýde júrgen adamdardy bir-birine ustap berý jáne sottalǵan adamdardy berý týraly Soltústik Makedoniiamen aradaǵy Sharttar toptamasy qaraldy. Osyǵan bailanysty Senat tóraǵasy Máýlen Áshimbaev pikir bildirdi, dep habarlaidy "Ult aqparat".
Senatorlar quqyqtyq kómek týraly mundai kelisimder shetelde júrgen Qazaqstan azamattarynyń quqyqtaryn qorǵaý úshin mańyzdy ekenin atap ótti.
«Búgin qabyldanǵan zańdar Qazaqstan men Soltústik Makedoniia arasyndaǵy quqyq qorǵaý salasyndaǵy yntymaqtastyqty damytýǵa baǵyttalǵan. Olar qylmyskerlerdi jaýapkershilikke tartýdyń ártúrli kezeńderin qamtidy jáne qylmyspen kúresti kúsheitý úshin memleketaralyq qatynastardyń quqyqtyq negizderin qalyptastyrady. Soǵan sáikes, qylmystardy tergeý protsesinde jan-jaqty kómek kórsetý, qylmyskerlerdi ustaý jáne olardy ekstraditsiialaý, sottalǵan adamdardy berý siiaqty ózara is-áreketter qarastyrylǵan. Bul qujattar zańnyń ústemdigin qamtamasyz etedi. Sondai-aq, azamattarymyzdyń quqyqtaryn qamtamasyz etýge múmkindik beredi», – dedi Máýlen Áshimbaev.
Qazaqstannyń quqyq qorǵaý qyzmetteriniń aqparaty boiynsha, qazirgi tańda eki el arasynda berýge jatatyn azamattar joq. Osy rette elimiz búginge deiin 30-ǵa jýyq memleketpen osyndai shart jasasqanyn aita ketken jón. Al qazirgi tańda shet elderde 922 qazaqstandyq jazasyn ótep jatyr.
Budan buryn habarlanǵandai, búgin Senattyń jalpy otyrysynda «Qazaqstan Respýblikasy men Soltústik Makedoniia Respýblikasy arasyndaǵy adamdardy ustap berý týraly shartty ratifikatsiialaý týraly» jáne «Qazaqstan Respýblikasy men Soltústik Makedoniia Respýblikasy arasyndaǵy sottalǵan adamdardy berý týraly shartty ratifikatsiialaý týraly», sondai-aq «Qazaqstan Respýblikasy men Soltústik Makedoniia Respýblikasynyń arasyndaǵy qylmystyq ister boiynsha ózara quqyqtyq kómek týraly shartty ratifikatsiialaý týraly» zańdary qabyldandy.
