Soltústik Qazaqstan oblysynyń turǵyny, Uly Otan soǵysynyń ardageri Grigorii Krasilnikov 100 jasqa tolyp, maidangerdi ǵasyr toiymen politseiler quttyqtady, dep habarlaidy QazAqparat.
SQO politsiia departamenti baspasóz qyzmetiniń málimetinshe, maidanger Grigorii Krasilnikovti 100 jyldyq mereitoiymen politseiler men politsiia departamenti ardagerler keńesiniń aqsaqaldary quttyqtady.
Grigorii Krasilnikov 1940 jyly Sverdlov oblysynan ásker qataryna shaqyrylǵan eken. Ol Qiyr Shyǵysta, Habarovsk ólkesinde ornalasqan atqyshtar polkine túsken.
Bul oqý rotasy bolatyn, onda zapastaǵy komandirlerdi daiyndaǵan.
1943 jylǵa deiin sonda qyzmet atqarǵan. Sáýir aiynyń sońynda ásker qataryndaǵylarmen birge Máskeýge kelgen.
Jaiaý ásker qatarynda soǵysqan. Shyǵys Polsha aýmaǵyndaǵy urysta aýyr jaraqattanyp, 1945 jyldyń 9 mamyryn gospitalde qarsy alǵan.
Qarasha aiynda ǵana úiine oralady. 1948 jyly KSRO IIM Sverdlovsk mektebine oqýǵa túsedi.
Oqý bitirgen jas mamandy SQO-ǵa jiberedi. Shirek ǵasyr qylmystyq-atqarý júiesinde jedel laýazymdarda qyzmet atqardy.
Ol basqarǵan koloniia tyń kóterý jyldaryndaǵy qurylystarǵa jumyldyryldy.
Zeinetke 48 jasynda shyqqan, biraq 80 jasqa deiin qyzmetin jalǵastyrǵan: aýdan ortalyǵy Sergeevkada eriktiler jasaǵyn basqaryp, jas qyzmetkerlermen tájiribesin bólisken.
Tórt bala tárbielep ósirgen. Ǵasyr jasaǵan ardager li tyń, gazet, kórkem ádebietti oqidy, mýzyka tyńdaǵandy jaqsy kóredi.
Politsiia departamentiniń bastyǵy Marat Tólebaev pen vedomstvolyq ardagerler keńesi tóraǵasynyń orynbasary Mihail Bednyh maidangerge myqty densaýlyq pen otbasy amandyǵyn tilep, qurmet kórsetti.
Grigorii Ivanovich óz estelikterimen bólisip, ystyq yqylastaryna alǵys bildirdi.
Búgingi tártip saqshylaryna tynyshtyq, amandyq pen sáttilik tiledi.
Soltústik Qazaqstan oblysynda soǵystan keiingi jyldarda 770 asa maidanger quqyq qorǵaý organdarynda eńbek etti.
Búgingi tańda olardyń kózi tirisi osy Grigorii Krasilnikov qana.
