Soltústik Qazaqstan oblysy Ýálihanov aýdany Mortyq aýylynda turǵyndardyń onshaqty buzaýy belgisiz aýrýdan óldi, dep habarlaidy "Ult aqparat".
SQO veterinariia basqarmasynyń bólim basshysy Qaiyrly Qazanovtyń aitýynsha, 21 shilde kúni Ýálihanov aýdany Mortyq aýylynda birneshe iri qara maldyń ólgeni jóninde telefon habarlamasy túsken.
22 shilde kúni oqiǵa ornyna veterinarlyq qyzmet mamandary baryp, epizootikalyq tekserý júrgizdi. Aram ólgen 7 buzaýdyń óleksesi tabyldy.
«Veterinarlar barǵanda mal isinip, buzyla bastaǵan eken. Mundai jaǵdaida maldyń neden ólgenin anyqtaý múmkin emes, óitkeni aýrýdy anyqtaý úshin synama mal ólgennen keiin 2-3 saǵattyń ishinde alynýy kerek. Sondyqtan tek qana boljam jasap otyrmyz. Mal shópten ýlanǵan nemese pasterellez bolýy múmkin», - deidi Qaiyrly Qazanov.
Mortyq aýylynda 600 bas qara mal, 2 myńǵa jýyq qoi-eshki jáne 800-ge jýyq jylqy bar. Turǵyndar túlikti aýyldan 7 shaqyrym jerdegi jaiylymda baǵady eken.
Mamandar ólgen maldy jaǵyp, ornyn Dizoldyń 1,5 %-dyq eritindisimen zalalsyzdandyrdy.
Sondai-aq aýrý taralmaýy úshin emfizemaly kórshiqanǵa, iaǵni qarasanǵa qarsy 400 qara malǵa ekpe egilgen.
Veterinarlar jaǵdaidy baqylaýda ustap otyr, ázirge mal qyrylýynyń jańa jaǵdailary tirkelgen joq.
