Búgin Úkimet otyrysynda QR Ulttyq ekonomika ministri Áset Erǵaliev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi josparyn tanystyrdy, dep habarlaidy QazAqparat.
«Ministrlik memlekettik organdarmen jáne uiymdarmen birlesip, óńirdiń áleýmettik-ekonomikalyq damýy men turaqty jumys oryndaryn qurýǵa tikelei ári janama mýltiplikativtik áserlerdiń joǵary áleýeti bar jobalardy muqiiat irikteý boiynsha jumys júrgizdi. Keshendi jospar investitsiialyq jobalardy iske asyrýdy, turǵyn úi jáne ózge de infraqurylymdy, áleýmettik salany damytýdy, sondai-aq qoǵamdyq quqyqtyq tártipti jáne azamattyq qorǵaýdy qamtamasyz etýdi kózdeitin 4 baǵyttan jáne 87 is-sharadan turady», - dedi ministr.
Onyń aitýynsha, jospardy iske asyrýdyń jalpy somasy 1,8 trln teńge, onyń ishinde respýblikalyq biýdjetten – 517,9 mlrdteńge, jergilikti biýdjetten – 43,9 mlrd teńge, jeke investitsiialar – 1,3 trln teńge.
«Jospar aiasynda 1,4 trln teńge somasyna 64 investitsiialyq jobany iske asyrý josparlanyp otyr. Olar AÓK, ónerkásip, kólik pen logistika, týrizm jáne sport, sondai-aq óńirdiń kásipkerliginiń belsendiligin damytýǵa baǵyttalǵan. AÓK-te 52 sút-taýar fermasy, qurama jem zaýyty, 3 bordaqylaý alańy, 2 qus fabrikasy, jylyjai kesheni salynady. Ónerkásipte Arnaiy ekonomikalyq aimaq aýmaǵynda CLAAS aýyl sharýashylyǵy tehnikasy óndirisin oqshaýlaý, JOHN DEERE servis ortalyǵy, «Aqsoran» jáne «Baian» volfram-molibden ken oryndaryn igerý, sondai-aq taý-ken metallýrgiia kombinatynyń jáne jańa óndiristik alańdardyń READY-BUILT FACTORY boiynsha kózdeledi», - dedi Á. Erǵaliev.
