Foto: ©RIA Novosti
Májilis depýtaty Nikita Shatalov ózge elder aýmaǵyndaǵy qarýly qaqtyǵystarǵa qatysýǵa nietti qazaqstandyqtarǵa úndeý tastady. Májilismen qolyna qarý almas buryn olardy Qazaqstan azamattyǵynan bas tartýǵa shaqyrdy, - dep habarlaidy Tengrinews.kz saity.
"Men qandai da bir sebeptermen bótenniń áskeri qaqtyǵystaryna qatysýǵa nietti qazaqstandyqtarǵa, azamattarymyzǵa úndeý jasaǵym keledi. Qolǵa qarý almas buryn Qazaqstan azamattyǵynan bas tartýǵa shaqyramyn. Soǵysty memleket ishine tartýdyń qajeti joq. Bul - memleketimiz ben qoǵamymyzdyń zańdaryna degen qurmetsizdiktiń kórinisi", - dedi Shatalov.
Depýtattyń aitýynsha, sońǵy kezderi ózge memleket azamattarynyń áleýmettik jeli arqyly jalǵan aqparat taratý úrdisi baiqalady. Sońǵy mysaldardyń biri Resei Memlekettik Dýmasynyń depýtaty Sergei Mironovtyń Qazaqstan Qylmystyq kodeksindegi jaldamalylyq týraly bapty absýrd dep ataǵan sózimen bailanysty. Ol sheteldegi áskeri qaqtyǵystarǵa qatysqan Qazaqstan, Qyrǵyzstan jáne Ózbekstan azamattary qylmystyq jaýapkershilikke tartylmaýyn talap etip, bul máseleni EAEO aiasynda sheshý kerek dep esepteidi.
"Qazaqstanda jaldamalylyq boiynsha jaza 10 jyldan astam ýaqyt buryn paida boldy. Qazaqstandyqtardyń sheteldik soǵystarǵa qatysýy Konstitýtsiiamyzǵa jáne Qazaqstannyń syrtqy saiasaty rýhyna qaishy keledi. Kez kelgen taraptyń kez kelgen áskeri qaqtyǵysqa qatysýy, meili ol Resei, Ýkraina nemese basqa memleket bolsyn, zańnyń barlyq sheginde jazalanady", - dedi Shatalov.
video: Tengrinews.kz
