Foto áleýmettik jeliden alyndy
"Ligalaiz" laqap atymen tanymal reseilik ártis Andrei Menshikov Astanadan Chernogoriiaǵa ushyp kete almaǵanyn málimdedi, dep habarlaidy Ulysmedia.kz.
Ol áýe kompaniiasynyń sheshimine bailanysty ony ushaqqa kirgizbei qoiǵanyn aitty.
"Kompaniia reseilik tólqujattary bar jolaýshylarǵa ushýǵa ruqsat bermedi. Men Býdvadaǵy kontsertti aýystyrýǵa májbúrmin. Áýetasymaldaýshynyń sheshimine qatysty eshqandai narazylyǵym joq. Meniń elim jasaǵan sumdyq qylmystar úshin jaýap berýge daiynmyn. Bul - ýkraindyqtar tartqan azappen salystyrǵanda túk emes. Soǵys toqtatylsyn", - dep jazdy ártis.
Ol Polshanyń LOT áýe kompaniiasynyń reisimen ushýy tiis bolǵan.
Aitpaqshy, sáýir aiynda dál osy kompaniia reseilik tennisshi Vitalii Diachenkony ushaqqa mingizbei qoiǵan.
"Lot aviakompaniiasy meniń Korsika týrnirine – Kairden Varshava arqyly Nitstsaǵa ushýyma múmkindik bermedi, óitkeni men Resei tólqujatynyń iesimin. Men Kair áýejaiynda 18 saǵat otyrdym, nár tatpai, áýejaidan kete almai oryndyqtarda uiyqtadym. Maǵan úshinshi dárejeli adam retinde qarady, birneshe myń eýro jumsaldy, endi týrnirge qatysýǵa múmkindik joq, óitkeni reseilikterdi tasymaldamaityn aviakompaniialar men vizalyq shekteýlerge bailanysty marshrýt joq", - dep shaǵymdanǵan sportshy.
Eske salaiyq, jýyrda Qazaqstanda qoǵam qarsylyǵynan keiin "Kamyziaki" kontsertteri toqtatylǵan bolatyn. Komandanyń kontsertteri Almaty qalasynda 5 qazanda jáne Astana qalasynda 7 qazanda ótedi dep josparlanǵan edi. Alaida jelide "Kamyziaki" komandasynyń Qazaqstandaǵy kontsertterin toqtatýdy talap etken petitsiia jariialandy.
"Azamat Musaǵaliev ázilkesh Nurlan Sabýrovpen birge qazaqstandyqtardyń narazylyǵyn týdyryp, TNT federaldy kanalynda qazaq tilin mazaq etip qana qoimai, Denis Dorohovpen jáne óziniń "Kamyziaki" komandasymen birge jaqynda okkýpatsiialanǵan Donetskte óner kórsetti. Qazaqstan Respýblikasynyń prezidenti Qasym-Jomart Kemeluly Toqaev Sankt-Peterbýrg Halyqaralyq ekonomikalyq forýmynda Resei Federatsiiasynyń prezidenti Pýtinmen kezdesýde Qazaqstan "Lýgansk jáne Donetsk halyq respýblikalaryn" moiyndamaitynyn málimdedi. Biz - qazaqstandyqtar egemen el Ýkrainaǵa agressiiany qoldaityn adamdardy óz elimizde kórgimiz kelmeidi. Biz - beibit elmiz jáne beibit halyqpyz", – dedi petitsiia avtorlary.
