Premer-Ministr Álihan Smaiylov elimizde ótken Prezident sailaýy aiasynda Úkimet jumysynyń aldaǵy jyldarǵa belgilengen negizgi baǵyttaryn atap ótti, dep habarlaidy "Ult aqparat" primeminister.kz saityna silteme jasap.
Úkimettiń kezekti otyrysyn ashqan Álihan Smaiylov Ortalyq sailaý komissiiasynyń aldyn ala qorytyndysy boiynsha Qasym-Jomart Kemeluly Toqaev aiqyn basymdyqpen jeńiske jetkenin aitty.
Onyń kandidatýrasyn parlamenttik partiialar men iri qoǵamdyq uiymdardy biriktirgen Halyqtyq koalitsiia usynǵan bolatyn jáne Qazaqstan halqy jappai óz qoldaýyn bildirdi.
«Úkimettiń aldaǵy jeti jyldaǵy negizgi mindeti – sailanǵan Memleket basshysynyń sailaýaldy baǵdarlamasyn sapaly ári nátijeli is júzine asyrý. Ekonomikada, áleýmettik salada jáne óńirlik saiasattaǵy túbegeili ózgerister osy sailaýaldy baǵdarlamanyń negizi bolyp tabylady», — dedi Premer.
Onyń aitýynsha, barlyq memlekettik organdar men vedomstvolar osy maqsat úshin, iaǵni ádiletti Qazaqstan qurý jolynda halyqtyń múddesine sai kúsh biriktirip, jumyla eńbek etýi tiis.
«Úkimettiń jumysy negizinen ekonomikany demonopolizatsiialaýǵa, kásipkerlik qyzmetti yntalandyrýǵa jáne azamattardyń tabysyn arttyrýǵa, bilim berý men densaýlyq saqtaý júielerin jańǵyrtýǵa baǵyttalatyn bolady», — dedi Premer-Ministr.
