Foto: primeminister.kz
Premer-Ministr Álihan Smaiylov jańa investor men ortalyq memlekettik organdar basshylarynyń qatysýymen Qarmet kompaniiasynyń qyzmeti boiynsha jumys tobynyń otyrysyn ótkizdi, - dep habarlaidy "Ult aqparat" Úkimettiń baspasóz qyzmetine silteme jasap.
Qabyldanǵan jedel sharalardyń arqasynda kásiporynda jeltoqsan aiynda óndiris kóleminiń artqany atap ótildi. Ferroqorytpa qory men kómir qory ósti. Daiyn ónimdi jóneltý qaita jandandy.
Kásiporyn qyzmetin turaqtandyrýǵa 28,6 mlrd teńge jeke investitsiia tartyldy. Eńbekaqy ýaqytyly berilip, salyq tólemderi, sondai-aq MÁMS tólemderi júrgizildi.
Otyrys barysynda qatysýshylar kombinatty qajetti shikizatpen qamtamasyz etý, daiyn ónim eksportyn qoldaý sharalaryn qamtamasyz etý, salyq salý, anyqtalǵan ekologiialyq buzýshylyqtardy joiý jáne basqa da birqatar máselelerdi talqylady.
2024 jyly Qarmet aldyndaǵy negizgi mindetter qatarynda – jumysshylardyń qaýipsizdigin qamtamasyz etý, óndiris kólemin ulǵaitý, jańa investitsiialyq kelisimsharttar jasasý jáne ónimsiz shyǵyndardy azaitý, t. b. arqyly ónimniń ózindik qunyn tómendetý máseleleri bar.
Jalpy jańa biznes-model aiasynda aldaǵy jyldary óndiristi jańǵyrtý jáne qaita uiymdastyrý, qaýipsizdik kórsetkishteri men ekologiialyq jaǵdaidy túbegeili jaqsartý (atap aitqanda, gazǵa kóshý), shyǵarylatyn ónim nomenklatýrasyn qaita qaraý jáne t. b. sharalar qabyldanady.
Premer-Ministr memlekettik organdar tarapynan kombinattyń ózekti máselelerin sheshýde qajetti qoldaý kórsetýi kerek ekenin atap ótti. Osyǵan bailanysty Álihan Smaiylov bir apta ishinde eń basym mindetter boiynsha qajetti sheshimderdi qabyldaýdy tapsyrdy.
