Premer-ministr Álihan Smaiylov Prezident Qasym-Jomart Toqaevtyń synynan keiin ministrler kabineti múshelerine úndeý jasady, - dep habarlaidy Tengrinews.kz agenttigi.
"Prezident bergen tapsyrmalardy nátijeli oryndaý kerek. Prezidenttiń bizdiń jumysymyzǵa qatysty keshe aitylǵan syny óte mańyzdy ekenin atap ótkim keledi. Barlyq memlekettik organ, ákimdikter men kvazimemlekettik sektor belsendiligin arttyrýy qajet. Birinshi basshylar Prezident tapsyrmalarynyń oryndalýyn jeke baqylaýǵa alýy kerek. Jobalar men baǵdarlamanyń bári óńirlerde júzege asyrylady. Olar halyqtyń ál-aýqatyna tikelei áser etedi. Sondyqtan, Úkimet pen ákimdikter ózara tyǵyz bailanys ornatyp, árbir máseleni birlesip sheshýi kerek", - dedi premer-ministr.
Smaiylov ministrler men ákimderge ózara tyǵyz bailanys ornatyp, árbir máseleni birge sheshý kerek ekenin aitty.
"Jalpy úkimet jumysynyń nátijeli bolýy árqaisymyzdyń tiimdi jumys isteýimizge bailanysty. El ekonomikasynyń damýy, azamattardyń turmys sapasynyń jaqsarǵanyn sezinýi úshin josparlanǵan jumysty birlesip júzege asyrýǵa kúsh salýymyz kerek", - dedi ol.
