QR Premer-Ministriniń mindetin atqarýshy Álihan Smaiylovtyń tóraǵalyǵymen ótken keńeste QR Prezidenti Qasym-Jomart Kemeluly Toqaevtyń osy jyldyń basynan bergen tapsyrmalaryn iske asyrý barysy qaraldy, dep habarlaidy "Ult aqparat" primeminister.kz-ke silteme jasap.
Keńeske ortalyq memlekettik jáne jergilikti atqarýshy organdardyń, «Atameken» UKP, ulttyq kompaniialar men holdingterdiń basshylary qatysty.
Keńesti bastamas buryn elde oryn alǵan tártipsizdiktiń qurbandaryn eske alý úshin bir minýttik únsizdik jariialandy.
Á. Smaiylov biylǵy jyl óte kúrdeli jáne qaiǵyly oqiǵalarmen bastalǵanyn aitty. Qazaqstan buryn bolmaǵan destrýktivti kúshterdiń agressiiasyna tap boldy. Eń úlken megapolis Almaty men kóptegen oblys ortalyqtary terrorister men banditterdiń soqqysyna ushyrady.
Á.Smaiylov qaza tapqandardyń otbasylaryna kóńil aityp, «Prezident Qasym-Jomart Kemeluly Toqaevtyń ýaqytyly jáne batyl is-qimyldarynyń arqasynda biz tártipsizdiktiń, zańsyzdyqtyń taralýyn toqtatyp, quqyq tártibin qalpyna keltire aldyq. Ókinishke orai, adamdar zardap shegip, jaralandy, túrli jaraqattar aldy. Biz olarǵa tezirek saýyǵyp ketýlerine tilektespiz. Eń ókinishtisi, azamattarymyzdyń arasynda qaza bolý jaǵdailary oryn aldy. Tártip pen zańdylyqty qalpyna keltirý nátijesinde politsiia men áskeri qyzmetshiler mert boldy. Biz olardyń Qazaqstan Respýblikasynyń konstitýtsiialyq qurylysyn saqtaý jolyndaǵy erlikterin maqtan tutamyz», — dedi.
Qazirgi jaǵdai jáne qabyldanyp jatqan sharalar týraly ulttyq ekonomika ministriniń mindetin atqarýshy Timýr Jaqsylyqov, ishki ister ministriniń mindetin atqarýshy Erlan Turǵymbaev, indýstriia jáne infraqurylymdyq damý ministriniń mindetin atqarýshy Beibit Atamqulov, saýda jáne integratsiia ministriniń mindetin atqarýshy Baqyt Sultanov, tótenshe jaǵdailar ministriniń mindetin atqarýshy Iýrii Ilin, densaýlyq saqtaý ministriniń mindetin atqarýshy Jandos Búrkitbaev, energetika ministriniń birinshi orynbasary Murat Júrebekov, Básekelestikti qorǵaý jáne damytý agenttiginiń tóraǵasy Serik Jumanǵarin baiandama jasady.
Memleket basshysynyń tapsyrmalaryn iske asyrý aiasynda quramyna arnaiy prokýrorlardy, UQK, IIM, sybailas jemqorlyqqa qarsy is-qimyl jáne qarjylyq monitoring agenttikteriniń qyzmetkerlerin qosa otyryp, vedomstvoaralyq jedel tergeý toby quryldy.
Bas prokýratýra terrorizm aktilerin jasaý, jappai tártipsizdikterdi uiymdastyrý jáne olarǵa qatysý faktileri boiynsha sotqa deiingi tergeý amaldaryn bastady.
Kúshtik qurylymdardyń jeke quramy qyzmet atqarýdyń jáne joǵary jaýyngerlik daiyndyqtyń erekshe rejimine aýystyryldy. Úkimettiń tótenshe rezervinen ishki ister organdary men Ulttyq ulannyń arnaiy bólimshelerin jaraqtandyrýǵa qajetti qarajat bólindi.
Jappai tártipsizdik kezinde kúshtik qurylymdardyń qaza tapqan qyzmetkerleriniń otbasylaryna materialdyq kómek kórsetý boiynsha sharalar qabyldanýda.
Azamattarǵa zardap shekkender men habar-osharsyz ketkender týraly aqparat berý úshin 1414 Biryńǵai bailanys ortalyǵy bazasynda tikelei jeli uiymdastyryldy. Tártipsizdikter saldarynan keltirilgen zalaldy baǵalaý jónindegi óńirlik komissiialar quryldy. «Atameken» UKP kásipkerlerden tiisti aqparatty jinaýdy júzege asyrýda.
Almaty qalasyn qospaǵanda, óńirlerdegi barlyq kommýnaldyq qyzmetter men tirshilikti qamtamasyz etý obektileri shtattyq rejimde jumys isteýde. Shuǵyl kómek kórsetetin meditsinalyq uiymdar jumys istep turǵan Almaty qalasyn qospaǵanda, respýblika boiynsha barlyq densaýlyq saqtaý nysandary shtattyq rejimde jumys istep tur.
Ekinshi deńgeili iri bankterdiń uialy bailanystyń bolýymen jumys isteitin onlain-servisterine qoljetimdilik qalpyna keltirildi. POS-terminaldar men bankomattar jelisiniń jumysy qamtamasyz etildi. Qazaqstan qor birjasynyń, Ulttyq Banktiń Qazaqstandyq bankaralyq esep aiyrysý ortalyǵynyń saýda júieleriniń jáne eldiń qarjy júiesiniń basqa da infraqurylymynyń shtattyq rejimde jumys isteýi qamtamasyz etildi.
Elimizdegi diplomatiialyq missiialardyń nysandaryn kúzetý kúsheitildi. Shet memlekettermen jáne halyqaralyq uiymdarmen turaqty bailanys qamtamasyz etilgen.
QR Premer-Ministriniń m.a. Á. Smaiylov Memleket basshysy qoiǵan mindetterdi sapaly ári jedel iske asyrýdy qamtamasyz etýdi tapsyrdy.
Á. Smaiylov sondai-aq áleýmettik mańyzy bar azyq-túlik taýarlarynyń baǵasynyń turaqtylyǵyn qamtamasyz etý, «Qazaqstan halqyna» qoǵamdyq qoryn qurý máselelerin pysyqtaý, halyqtyń áleýmettik osal toptary úshin qaitalama turǵyn úidi jaldaý aqysynyń bir bóligin sýbsidiialaý tártibi men tetigin ázirleý jóninde tapsyrma berdi.
«Azamattardyń barlyq syndarly ótinishterin muqiiat zerdelep, olar boiynsha qajetti sheshimder ázirleý kerek. Barlyq ortalyq jáne jergilikti atqarýshy organdar, «Atameken« UKP eki apta merzimde halyq kótergen máselelerdi sheshý boiynsha usynystardy Ulttyq ekonomika ministrligine jiberýi tiis», — dedi Á. Smaiylov.
