Qazaqstan Respýblikasynyń Premer-Ministri Álihan Smaiylov Eýraziialyq úkimetaralyq keńes otyrysy aiasynda Qyrǵyzstan Respýblikasynyń Ministrler kabinetiniń tóraǵasy Aqylbek Japarovpen ekijaqty kelissóz ótkizdi. Bul týraly Úkimettiń baspasóz qyzmeti habarlady.
Taraptar saýda-ekonomikalyq jáne investitsiialyq yntymaqtastyq, ónerkásip jáne otyn-energetika kesheni, ekologiia, bilim berý salasyndaǵy ekijaqty yntymaqtastyqtyń birqatar ózekti máselelerin talqylady.
Ekijaqty saýda kólemin arttyrý aiasynda taraptar jetkiziletin aýyl sharýashylyǵy ónimderiniń nomenklatýrasyn keńeitý jóninde pikir almasty. Budan basqa, birlesken indýstriialyq saýda-logistika keshenin qurý máselesin iske asyrý bastaldy.
«Qyrǵyzstan – Qazaqstannyń Ortalyq Aziia aimaǵyndaǵy mańyzdy saýda seriktesi. Ózara saýdanyń oń serpininiń qalpyna kelýin atap ótkim keledi. 2021 jyldyń qorytyndysy boiynsha saýda kóleminiń shamamen 15%-ǵa artqany baiqalady», — dedi Álihan Smaiylov kelissóz kezinde.
Avtomobil ónerkásibi boiynsha yntymaqtastyq sheńberinde qyrǵyz tarapy avtokólik tehnikasyn satyp alý jáne lizing máselesin qarastyrýda. Qazirgi ýaqytta tehnikalyq máseleler pysyqtalyp jatyr.
Transshekaralyq sýlar jáne energetikalyq yntymaqtastyq boiynsha taraptar transshekaralyq ózenderdiń aǵysy máselesin rettedi, sonyń nátijesinde eki memleket úshin de vegetatsiialyq kezeńde Syrdariia, Shý jáne Talas ózenderiniń basseinderinde sýdyń azaiýynyń yqtimal teris saldarynyń aldyn alý sharalary qabyldandy.
Budan basqa, taraptar ózge de ózekti máseleler men saýda-ekonomikalyq yntymaqtastyqty keńeitý jóninde pikir almasty.
