Foto: facebook.com/cpcpipe
Premer-ministr Álihan Smaiylov Qazaqstan munaiyn Kaspii qubyr konsortsiýmy (KQK) arqyly jóneltýge qatysty jaǵdai týraly aitty, - dep habarlaidy Tengrinews.kz.
"5 shildede Novorossiisktegi Primorsk aýdandyq soty KQK jumysyna bir aiǵa shekteý qoidy. 6 shildede biz reseilik áriptesimiz – Úkimet tóraǵasymen bailanysyp, sol kúni bul máseleni sheshtik. KQK qubyrynyń jumysy shtattyq rejimde júrip jatyr. Munai eksportyna eshqandai shekteý joq", - dedi Úkimet basshysy Qazaqstan telearnasyndaǵy "Jańa Qazaqstan" baǵdarlamasynda.
Eske salaiyq, buǵan deiin Novorossiisk qalasyndaǵy aýdandyq sot Kaspii qubyr konsortsiýmynyń qyzmetin 30 kúnge toqtatý týraly sheshim qabyldaǵan bolatyn. Keiin Resei soty KQK jumysyn toqtatý týraly sheshimdi 200 myń rýbl aiyppul tóleýge ózgertti.
