QR Premer-Ministri Álihan Smaiylov Memleket basshysynyń tapsyrmalaryn oryndaý boiynsha keńes ótkizdi, onda azyq-túlik baǵasynyń ósýin tejeý jónindegi sharalar, investitsiialar tartý jáne óńirlerdegi ózekti áleýmettik problemalardy sheshý máseleleri qaraldy, dep habarlaidy "Ult aqparat" Úkimettiń baspasóz qyzmetine silteme jasap.
Premer-Ministrdiń orynbasary – saýda jáne integratsiia ministri Baqyt Sultanov jyl basynan beri áleýmettik mańyzy bar azyq-túlik taýarynyń baǵasy 17,4%-ǵa kóterilgenin habarlady. Piiaz, qant, sábiz, kartop, qaraqumyq, makaron, un jáne qyryqqabat baǵalary eń kóp ósken. Al taýyq jumyrtqasynyń baǵasy tómendegen.
Óńirler bólinisinde azyq-túlik Jetisý jáne Jambyl oblystarynda (19%), Almaty, Mańǵystaý jáne Ulytaý oblystarynda (18,9%), sondai-aq Nur-Sultan jáne Shymkent qalalarynda (18,6%) qymbattaǵan.
Premer-Ministr álsiz kontraktatsiia piiaz ben basqa da kókónis baǵasynyń ósýine ákeletinin atap ótti. Máselen, piiaz baǵasy Qyzylorda oblysynda jáne Shymkent qalasynda eń kóp ósken.
Álihan Smaiylov «ainalym shemasy» sheńberinde kásipkerlik sýbektilerin qarjylandyrý boiynsha jumysty jandandyrýdy, turaqtandyrý qorlarynyń tolyqtyrylýyn qamtamasyz etýdi jáne bólshek saýda ústemesine monitoring júrgizýdi tapsyrdy.
Básekelestikti qorǵaý jáne damytý agenttigine kóterme jetkizýshilerdiń baǵalyq sóz bailasý jáne básekelestikke qarsy is-áreketterin baqylaýdy kúsheitý, Qarjylyq monitoring agenttigine zańsyz qant satýshylardyń qyzmetteriniń jolyn kesý, onyń ishinde áleýmettik jeliler men jarnamalyq qosymshalar arqyly satýdy boldyrmaý, sondai-aq qant jetkizý arnalaryn baqylaýǵa alý tapsyryldy.
«Aýyl sharýashylyǵy ministrligi azyq-túlikpen qamtamasyz etýge taldaý júrgizip, importtyń qajetti kólemin aiqyndap, ózimizde ónim óndirýdi ulǵaitý boiynsha qosymsha sharalar qabyldaýy qajet», — dedi Álihan Smaiylov.
Kún tártibindegi ekinshi máseleni qaraý barysynda Úkimettiń QR investitsiialyq saiasatynyń jańa tujyrymdamasyn qabyldaǵany atap ótildi, onyń sheńberinde negizgi kapitalǵa salynǵan investitsiialar boiynsha jańartylǵan indikator 2026 jylǵa qarai JIÓ-niń 25,1% deńgeiinde belgilendi.
Bul rette búgingi kúni keibir óńirlerde nysanaly kórsetkishterge qol jetkizilmei otyr. Máselen, Shymkent boiynsha oryndaý kórsetkishi 47,3%-dy, Túrkistan oblysy boiynsha – 49,1%-dy, Jambyl oblysy boiynsha – 65,8%-dy quraidy.
«Árbir óńir óziniń nysanaly indikatorlaryna qol jetkizý boiynsha jan-jaqty sharalar qabyldaýy qajet. Bul jumysty erekshe baqylaýda ustaý kerek», — dep atap ótti Premer-Ministr.
Keńeske qatysýshylar óńirlerde jalaqy boiynsha bereshekti boldyrmaý, eńbek daýlaryn sheshý jáne aldyn alý máselelerin, sondai-aq TKSh júiesinde tarifterdiń ósý faktorlaryn talqylady.
Úkimet basshysy memlekettik organdarǵa taldaý jáne boljaý qyzmetin kúsheitýdi, qazirgi problemalyq jaǵdailar, sondai-aq olardy sheshý úshin memleket qabyldap jatqan sharalar boiynsha azamattarǵa egjei-tegjeili jáne negizdi túsindirýdi qamtamasyz etýdi tapsyrdy.
Ulttyq ekonomika ministrligine kommýnaldyq qyzmetter tarifteriniń ózgerýin baqylaýda ustaý, Indýstriia jáne infraqurylymdyq damý ministrligine óńirlerde kómirdi ýaqytyly jetkizýdi jáne úlestirýdi qamtamasyz etý, Energetika ministrligine ishki naryqty JJM-men qamtamasyz etý jóninde sharalar qabyldaý tapsyryldy.
