Úkimet iri biznes ókilderimen ózara birlesip jumys isteýge qashan da daiyn. Bul týraly búgin QR Premer-Ministri Álihan Smaiylov Memleket basshysynyń otandyq biznes ókilderimen kezdesýinde aitty, dep habarlaidy QazAqparat.
«Iri kásipkerliktiń Qazaqstan ekonomikasyndaǵy úlesi 48 paiyzdy quraidy. Sondyqtan osy biznes segmentiniń jaýapkershiligi de óte zor. Úkimet biznestiń, onyń ishinde iri biznestiń de damýyna qolaily jaǵdai jasaý úshin tiisti sharalardy qabyldaidy. Qazirgi tańda jahandy jailaǵan daǵdarystan keiingi bizdiń aldymyzda turǵan eń mańyzdy máseleniń biri – makroekonomikalyq turaqtylyqty qamtamasyz etý», - dedi ol.
Premer-Ministr Úkimet pen Ulttyq banktiń birlesken saiasaty osy maqsatqa baǵyttalatyndyǵyn basa aitty.
«Bul rette, eń kúrdeli máseleniń biri – ol infliatsiia deńgeiin tómendetý», - dedi Álihan Smaiylov.
Ol Prezident tapsyrmasyna sáikes Úkimet tiisti jedel sharalarmen birge, júieli sharalardy da iske asyratynyn atap ótti.
«Birinshi kezekte, bul – aýylsharýashylyq ónimderin óndirý, azyq-túlikpen ishki naryqty tolyqtyrý jáne azyq-túlik qaýipsizdigin qamtamasyz etý. Mezgilaralyq kezeńde infliatsiia qysymy men syrtqy faktorlardyń áserin tómendetý úshin tiisti logistika júiesin qurý óte mańyzdy. Iri kásipkerlerdi osy jumysqa qatysýǵa shaqyramyz. Úkimet iri biznes ókilderimen ózara birlesip jumys isteýge qashan da daiyn ekenin aitqym keledi», - dedi Úkimet basshysy.
