QR Premer-Ministriniń birinshi orynbasary Álihan Smaiylov aglomeratsiialardy damytý týraly zań jobasy ne úshin kerektigin túsindirdi, dep habarlaidy QazAqparat.
«Búginde damyǵan elderdiń ekonomikasynda iri qalalardyń, megapolisterdiń orny erekshe. Álemdegi ishki ónimniń jartysy eń 300 iri aglomeratsiiaǵa tiesili. Al bul qalalarda jer betindegi halyqtyń 20 paiyzy turady. BUU boljamy boiynsha 2050 jylǵa qarai halyqtyń úshten ekisi qalalarda turatyn bolady. Basqasha aitsaq, qaladaǵy halyq sanyn 2,5 mlrd adam tolyqtyrady. Osylaisha, sheshim qabyldaý men ǵylymnyń, tehnologiialardyń ortalyǵy álemdegi 200 memleket emes, 600 iri megapolis bolady. Halyqaralyq trendterdi eskersek, Qazaqstannyń iri qalalary da jahandyq mańyzdaǵy qalaǵa ainalýǵa talpynýy kerek. Sondyqtan Memleket basshysy iri qalalardy keshendi damytý týraly tapsyrma berdi», - dedi ol Úkimet úiinde ótken brifingide.
Onyń aitýynsha, atalmysh zań jobasy aglomeratsiiaǵa kiretin ákimshilik-aýmaqtyq birlikter arasyndaǵy qatynastardy retteidi.
«Qalalardyń, aglomeratsiia ortalyqtarynyń ókileti keńeitiledi. Aglomeratsiialardy damytý máselesi – qala men oblys arasyndaǵy biýdjetaralyq qatynastar máselesi, qarjy naryqtarynyń ózere áreket máselesi, qala qurylysy, sáýlet, jer qatynastary máselesi, ekologiia jáne transport máselesi. Osy máselelerdiń bári aglomeratsiialardy damytý týraly zań jobasynda kórinis tabady. Ony daiyndaýǵa otandyq ta, sheteldik te sarapshylar, birinshi kezekte Dúniejúzilik bank sarapshylary tartylyp otyr», - dedi Álihan Smaiylov.
