Jazýshy Smaǵul Elýbai QR Prezidenti Qasym-Jomart Toqaevpen ne týraly sóileskenin aityp berdi, dep habarlaidy QazAqparat.
Jazýshy men Prezident arasyndaǵy áńgime asharshylyq, til taǵdyry, ádebiet ahýaly, eldiń kóńil-kúii taqyryptarynyń ainalasynda órbipti.
«Prezidentke eń birinshi asharshylyq týraly aittym. 2021 jyly 1921 jylǵy asharshylyqqa 100 jyl, 1930 jyldardaǵy asharshylyqqa 90 jyl tolady. Qasiretti dataǵa 1,5 jyl ǵana ýaqyt qaldy. Sol zulmatta qurban bolǵan 4 mln arýaqty ulyqtaý sharalary jóninde usynystar aittym.
«Eskertkishter qoiyldy ǵoi. Degenmen milliondaǵan qurbanǵa úlken memorial qoisaq laiyqty. Uly tragediiaǵa laiyqty kórkem film túsirse, ǵajap bolar edi. Asharshylyq týraly ózimiz jazǵan «Aq boz úi» romanynyń sońǵy taraýy boiynsha stsenarii daiyndaǵan bolatynmyn. Sol máseleni sizge qulaqqaǵys qylyp otyrmyn», - dedim. Ol kisi quptaitynyn aitty.
«Stsenaridi maǵan jiberińiz» degen soń, búgin jiberdim. Sóitip, Qudai qalasa, atalmysh dataǵa orai «Aq boz úi» degen stsenarii boiynsha film túsirý jumysyna kirisýimiz múmkin. Men osyǵan qýandym. Aitaiyn degen negizgi sharýamnyń biri osy bolatyn», - deidi qalamger.
Smaǵul Elýbai qazaq tiliniń taǵdyry da áńgimege arqaý bolǵanyn aitady.
«Sodan keiin til jóninde aittyq. Til zańynyń qabyldanǵanyna 30 jyl tolady. Osy jóninde de shuǵyl is-áreket kerektigin, jurt kútip otyrǵanyn jetkizdim. Memlekettik tildiń mártebesi áli de óz deńgeiine kelgen joq degen pikir aittyq. Prezident ony da qoldaitynyn bildirdi», - deidi ol.
Áńgime barysynda Prezident «Qazaqfilm» kinostýdiiasyn damytýǵa kúsh salynatynyn aitqan kórinedi. Sondai-aq kinodramatýrg «Qazaqfilm» kinostýdiiasyn elordaǵa kóshirýge qarsy ekenin de aitqan eken.
«Ol kisi: «Buǵan núkte qoiyldy. Endi tek «Qazaqfilmdi» damytamyz», - dedi. Bul da men úshin jaqsy jańalyq boldy», - dedi kinoger.
«Ol kisi Abai hakimniń 175 jyldyǵyna óz úlesińizdi qosatyn shyǵarsyz degendi aitty», - deidi Smaǵul Elýbai.
Jazýshynyń oiynsha, Abai týraly talai film túsirilgenimen, sonyń eshqaisysy Abaiǵa laiyq deńgeide shyqpaǵan.
«Abaidyń atyn paidalanyp, bir jyldyń ishinde laiyqty kórkem film túsirý óte aýyr nárse. Men ony kinoger retinde aityp otyrmyn. Ol - múmkin emes dúnie. Sondyqtan asyqpaý kerek degendi aittyq. Ol kisi bárin jazyp alyp otyrdy. Osyndai-osyndai áńgimeler aityldy. Ol kisi eldegi poeziia men prozanyń damýy qalai degen suraq qoidy.
«Poeziianyń deńgeii óte joǵary deńgeide. Proza jaily olai aitý qiyn. Óitkeni, qazir jurt kólemdi dúnieni oqymaityn boldy. Bizdiń prozamyzǵa qaita qurý, úlken ózgerister kerek siiaqty. Bul jalǵyz qazaq prozasynyń basyna túsken náýbet emes, jalpy álemdik prozanyń problemasyna ainalyp otyr», - degen pikir aittym. Prezident ádebiet, mádeniet, kino salasyna óte qamqor azamat ekenin kórsetti», - degen qalamy qarymdy jazýshy kezdesýden kóterińki rýhpen shyqqanyn aitady.
«Prezidentke kóńilimizge ártúrli oilar kelip barǵan edik. Shyqqanda kóńilimiz tolyp, optimistik rýhta qaittyq. Iaǵni, Elbasy aitpaqshy, Prezidentimizdi bárimiz túgel qoldaýymyz kerek eken. Sonda ǵana bizdiń kók týymyz tuǵyrly bolmaq degen oi túidik. Búkil el, aǵaiyn kók týdyń mańaiyna shoǵyrlaný qajet qazirgi tańda. Qasym-Jomart Toqaev soǵan laiyqty tulǵa dep aitar edim», - dep túidi jazýshy.
Aita keteiik, keshe Qasym-Jomart Toqaev jazýshy jáne kinodramatýrg Smaǵul Elýbaidy qabyldaǵan bolatyn.
