«Slavian bazary» óner festivaliniń ajyramas bóligi sanalatyn «Vitebsk-2021» estradalyq án oryndaýshylardyń halyqaralyq baiqaýynyń birinshi kúni ótti, dep habarlaidy "Ult aqparat" Dimashnews resýrsyna silteme jasap.
Biyl álemniń 14 elinen kelgen qatysýshylar «Vitebsk» jas oryndaýshylar baiqaýynyń Gran-pri iegeri – «Altyn lira» músinshesi jáne 20 myń dollar úshin baq synaýda.
Konkýrstyń erejesine sáikes, oǵan ulttyq konkýrstardyń laýreattary men diplomanttary atanǵan 18 jastan 31 jasqa deiingi ánshiler qatysa alady.
Ár elden bir ǵana ókil bola alady. Bul joly Qazaqstan namysyn Rýhiia Baidúkenova qorǵap jatyr.
«Álemdik hit» dep atalatyn baiqaýdyń alǵashqy kúninde qatysýshylar álemdik diagrammalarda jetekshi orynǵa ie bolǵan tanymal týyndyny oryndady.
Árbir ártistiń óner kórsetýi jeke shaǵyn spektakl retinde qabyldandy. Kópshiliktiń súiikti kompozitsiialary «Todes» shoý-baletiniń horeografiialyq qoiylymdarymen sheber úilesti.
Baiqaýǵa qatysýshylar myńdaǵan kórermen aldynda óz talantyn barynsha ashýǵa jáne shyǵarmashylyq áriptesteriniń aldynda sheberligin kórsetýge tyrysty.
Qatysýshylardyń ónerin kelesi quramdaǵy Anatolii Iarmolenko (Belarýs) tóraǵalyq etetin halyqaralyq qazylar alqasy baǵalady: Mishel Poma (Italiia), Konstantin Moskovich (Moldova), Sergei Penkin (Resei), Taisiia Povalii (Ýkraina), Patrik Jan-Batist (Frantsiia), Dimash Qudaibergen (Qazaqstan).
Qazylar oryndaýshylyq sheberlikti 10 baldyq júie boiynsha ashyq elektrondy daýys berý arqyly baǵalady.
Birinshi baiqaý kúniniń nátijesi boiynsha eń kóp upaidy eki qatysýshy aldy.
Qazaqstannyń ókili Rýhiia Baidúkenova «Emotions» kompozitsiiasymen jáne Serbiiadan kelgen qatysýshy Irina Arsenievich «I surrender» ánimen 70 baldyń 69 ballyn jinady.
Keshti «Rise like a phoenix» ánimen ashqan Ýkrainadan kelgen qatysýshy Renata Shtifel 64 upaimen kóshbasshylar úshtigine kirdi.
Dál osy úsh qatysýshy qazylar alqasynyń eń jas múshesi, «Vitebsk-2015» Gran-pri iegeri Dimash Qudaibergennen 10 ball aldy.
Baiqaýdyń ekinshi kúni búgin, 18 shilde kúni keshke ótedi. Onda qatysýshylar slavian eliniń kompozitorlarynyń estradalyq ánin slavian tilinde orkestrdiń súiemeldeýimen oryndaidy.
