«Slavian bazary» halyqaralyq óner festivalinde Qazaqstannyń atynan óner kórsetip, 1-oryn alǵan Ernar Sadyrbaev Astanada baspasóz málihatyn ótkizdi, dep habarlaidy QazAqparat tilshisi.
Ánshiniń prodiýseri Jan Muqanov baiqaýda bolǵan qyzyqty oqiǵalardy aityp berdi.
«Baiqaýdyń sońǵy kúni «Ámire» quny bir jarym million teńge bolatyn qymbat kostiým kiip shyqty. Kostiýmnyń ádemiligi sonsha, sahna syrtynda barlyq ártister ustap kórip, fotoǵa túsip jatty. Sol kúni Ámire sahnaǵa týmen shyǵýǵa bola ma dep ruqsat surady. Men onyń kostiýmy kórinbei qalady dep ýaiymdap turmyn (kúldi-avt.). «Esesine týymyz kórinedi» dep jaýap berdi Ernar Sadyrbaev. Osylaisha, «Ámire» on bes qatysýshynyń arasynda týmen shyqqan jalǵyz qatysýshy boldy. Al qymbat kostiýmdy Qazaqstanǵa ákelý buiyrmady, qazir bizde joq», - dep eske aldy Jan Muqanov Ortalyq kommýnikatsiialar qyzmetinde ótken baspasóz máslihatynda
Prodiýserdiń aitýynsha, baǵaly kostiým qazaqstandyq qyzmetkermen renjisip qalǵan Polsha ánshisine syiǵa berilgen.
«Ádilqazy alqasynda 2000 jyldary bas júlde alǵan, Polsha elinen kelgen ánshi boldy. Biz ony alǵash ret kórdik, biraq ony tutas Eýropaǵa tanymal ánshi deidi. Sol ártis «Kostiýmyńyzdy satyńyz» dep Ernarǵa jabysty. Biz satqan joqpyz. Baiqaý aiaqtalyp, elge jinalyp jatqanda, kishigirim arazdastyq boldy. Qazaqstandyq qyzmetkerlerdiń biri Polsha ánshisimen arazdasyp, qatty sózder aitypty. «Ámire» keshirim retinde kostiýmdy syilaiyq dep usynys bildirdi. Qymbat kostiým, árine, biraq Polsha ánshisine syiladyq. Ánshiniń qýanyshynda shek bolmady», - dedi ol.
Sonymen birge, prodiýser Ernar Sadyrbaevpen qalai tanysqanyn aityp berdi.
«Ámiremen» kezdeisoq tanystym. «Sálem, Uly dala» jobasyna promo-rolik ázirlep jatqanda joba ánuranyn aitatyn ánshi qajet boldy. Sol kezde Ámireniń án aitqanyn kórdim. Keiin metroǵa túskende, qolma-qol aqsha tappai qaldym, kartadaǵy aqshamdy esh jer qabyldamady. Sonda «Ámire» men úshin 100 teńge tóledi. Osylaisha, bir metro biletimen meni satyp aldy (kúldi-avt.). Shyn máninde, ol (Ernar Sadyrbaev-avt.) Qostanai oblysynda týǵan qarapaiym jigit, eń bastysy óte daryndy jigit», - dedi Jan Muqanov.
Aita keteiik, «Slavian bazary» halyqaralyq óner festivali Belarýs memleketin dúniejúzine tanymal etti. 2015 jyly bul baiqaýda qazaqstandyq Dimash Qudaibergen bas júldeni ielengen bolatyn.
Biyl Qazaqstan atynan óner kórsetip, júldeli 1-oryn alǵan Ernar Sadyrbaev áýeli Nurǵisa Tilendievtiń «Qustar ánin» shyrqady. Ekinshi kúni orkestrdiń súiemeldeýimen Raian Poýstyń «Podberi mýzyký» jáne Rokopera Motsarttyń «Ia spliý na rozah» atty shyǵarmalaryn oryndady.
