Soltústik Qazaqstan oblysynda shaǵyn ózenderdiń sýy molaiyp, tasi bastady. Vozvyshenka eldimekeni mańyndaǵy Aqanburlyq ózeniniń deńgeii bir táýlikte 273 sm deiin kóterildi, dep habarlaidy "Ult aqparat".
SQO tótenshe jaǵdailar departamentiniń málimetinshe, Ǵ.Músirepov atyndaǵy jáne Aiyrtaý aýdandaryndaǵy shaǵyn ózenderde sý deńgeii kóterilip jatyr. Esil ózeninde de ózgeris bar. Alaida ázirge qaýipti deńgeige jetken joq.
«Kúnniń jylynýyna bailanysty aǵyn sýlar paida bolyp, ózen-kólderge quiylyp jatyr. Sý qoimalaryna kúndelikti monitoring júrgizemiz. Eldimekenderdi sý basý jaǵdailary tirkelgen joq. Tek eki avtojoldyń ústinen sý ketti», - deidi SQO TJD basqarmasynyń bastyǵy Rústem Jumaǵaliev.
Imantaý eldimekenindegi Zmeika ózeni erigen qar sýymen tolyǵyp, arnasynan shyqty. Diametri 500 mm qubyr sýdy ótkize almaǵan. Saldarynan sý jolyndaǵy bir jylyjaidy shaiyp ketti.
«Qazir Imantaý aýylynda sý joq. Jaǵdai turaqtaldy. Aryqtar qazylyp, sý alqapqa jiberildi. Jalpy barlyq aýdandarda sý basý qaýpi bar. Baqylaýda ustap otyrmyz. Osy aptada aýa temperatýrasy +15 gradýske deiin joǵarylaidy. Qazir oblys aýmaǵynyń 80 %-ynda qar jatyr», - deidi Rústem Jumaǵaliev.
Sileti sý qoimasy qazirgi ýaqytta 90 %-ǵa tolǵan. Erneýinen asý úshin 59 sm jetpeidi. Sergeev sý qoimasy 91 %-ǵa tolǵan. Esil ózenindegi muz jarylǵan joq. Osy aptada aýa temperatýrasynyń jylynýyna bailanysty muz júre bastaidy degen boljam bar.
Qazir oblystyń eki aýdanynda qutqarýshylardyń arnaiy toby jumys istep jatyr. Búgin Ýálihanov aýdanyna kóktemgi sý tasqynymen kúreske osyndai arnaiy jaraqtandyrylǵan top jiberiledi.
«Qazgidromet» RMK SQO filialynyń málimetinshe, óńirdiń shaǵyn ózenderinde – Imanburlyq, Aqanburlyq, Muqyr, Sharyqta sý deńgeii kúnnen-kúnge kóterilip keledi. Bir táýliktiń ishinde Vozvyshenka eldimekeni mańyndaǵy Aqanburlyq ózeninde sý deńgeii 273 sm deiin kóterilgen.
