SQO-da aýyl sharýashylyǵy ónimderin qaita óńdeýge basymdyq beriledi.
Bul týraly Soltústik Qazaqstan oblysynyń ákimi Qumar Aqsaqalov aityp berdi, dep habarlaidy QazAqparat.
«Aýyl sharýashylyǵy – bizdiń aimaq úshin negizgi sala. Byltyr osy alańda aýyl sharýashylyǵyn ártaraptandyrý baǵytyn tańdaý týraly aittym. Ol óziniń jemisin berýde. Aýyl sharýashylyǵy óniminiń kólemi – 700 mlrd teńgege jetti. Bul 2019 jyldyń kórsetkishinen 89 milliard teńgege asyp tústi», - dedi óńir ákimi Ortalyq kommýnikatsiialar qyzmetinde ótken brifingte.
Jyl sońyna deiin 115 milliard teńge investitsiia tartylady. Osylaisha, aimaq eldegi agroinvestitsiianyń 25% qamtamasyz etedi.
«Qurǵaqshylyqqa qaramastan, biz dástúr boiynsha el astyǵynyń tórtten birin jáne maily daqyldardyń úshten birin jinadyq. Bul – barlyq agrotehnikalyq sharalardy oryndaýdyń nátijesi. Óńir diqandary respýblikada tehnikany jańartý jáne mineraldy tyńaitqyshtardy engizý boiynsha kósh basynda tur.
Biz ósirilgen ónimdi meilinshe qaita óńdeýimiz kerek. Ózderińiz biletindei, astyq óńdeý boiynsha segiz jyldyq úzilisten keiin «Biopereishn» JShS iri jobasy qalpyna keltirildi. Jaqynda zaýytty jańǵyrtýdyń úshinshi kezeńi aiaqtalady, oǵan investor 12 mlrd teńge saldy. Endi kásiporyn krahmal, gliýten, jelimtekpen birge bioetanol óndiredi. Bioetanol, eń aldymen, otyndaǵy oktandy kóbeitedi. Ónimge suranys joǵary. Qazir Pavlodar munai óńdeý zaýytyna bioetanol jetkizýge shart jasastyq. Bastapqy kezeńde jylyna 20 myń tonna bioetanol óndirý josparlanýda, onyń kólemi birtindep 36 myń tonnaǵa deiin ulǵaiady. Osylaisha, biz eldiń osy ónimge degen qajettiligin tolyǵymen jabamyz», - dedi Aqsaqalov.
