Soltústik Qazaqstandaǵy kásiporyndar Qorǵanys ministrligimen yntymaqtastyq ornatýǵa daiyn, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Qorǵanys ministrligi Qarýly Kúshterdiń qajettiligin eskere otyryp, Petropavl aýyr mashina jasaý zaýytymen jáne S.M. Kirov atyndaǵy zaýytpen birge keleshektegi arnaiy ónimdi óndirý múmkindikterin qarastyrýda.
Soltústik Qazaqstan oblysyna jumys sapary barysynda qorǵanys ministri Nurlan Ermekbaev atalǵan zaýyttar jumysymen tanysyp, kásiporyndar basshylyǵymen kezdesti. Onda óndiristik qýat júktemesin jáne ónim jetkizýdi arttyrý máseleleri talqylandy.
PAMJZ – arnaiy ónimniń, kópbeiindi óndiristik qýaty bar munai-gaz, energetikalyq jáne temir jol jabdyǵynyń qazaqstandyq óndirýshisi sanalady.
S.M. Kirov atyndaǵy zaýyt elektrtehnikalyq ónimniń, bailanys quraldarynyń, qaýipsizdik júieleri men arnaiy maqsattaǵy ónimniń óndirisine mamandanady.
Odan basqa, Petropavlǵa jumys sapary sheńberinde Qorǵanys ministrligi, Soltústik Qazaqstan oblysy ákimdigi men «Jas sarbaz» balalar men jasóspirimder áskeri-patriottyq qozǵalysy» respýblikalyq qoǵamdyq birlestigi arasynda jastardy áskeri-patriottyq tárbieleý salasyndaǵy yntymaqtastyq pen ózara is-qimyl týraly memorandýmǵa qol qoiyldy. Atalǵan memorandým birlesken is-sharalardy, baǵdarlamalar men jobalardy iske asyrýǵa, áskeri-patriottyq tárbie salasynda aqparat pen tájiribe almasýǵa múmkindik beredi.
Sonymen qatar, qorǵanys ministri 2019 jylǵy kúzde Arys qalasyndaǵy tótenshe jaǵdai saldaryn joiý kezinde qaza tapqan maior Aqyshevtiń ata-anasymen kezdesti. Ol marqumnyń otbasy men jaqyndaryna kóńil aityp, ákesine I-shi dárejeli «El qorǵany» medalin tabys etti.
Esterińizge sala keteiik, «El qorǵany» vedomstvolyq medali 2017 jyldan bastap úlgili qyzmeti men memleket qorǵanysyna salmaqty úles qosqan áskeri qyzmetshilerge beriledi.
