Foto: SQO TJD baspasóz qyzmeti
Soltústik Qazaqstan oblysynyń Taiynsha qalasyna sý tasqynymen kúreske kómekke kelgen túrkistandyq qutqarýshy - azamattyq qorǵaý praporshigi Bekjan Baldanov kenetten qaitys boldy, dep habarlaidy "Ult aqparat" SQO Tótenshe jaǵdailar departamenti baspasóz qyzmetine silteme jasap.
2 sáýirge qaraǵan túni 45 jastaǵy Bekjan Baldanov Taiynsha qalasyndaǵy aýdandyq aýrýhananyń reanimatsiia bólimine túsken. Alaida dárigerler onyń ómirine arasha túse almady. Ólimge jiti miokard infarktisi sebep bolǵan.
Er adam Túrkistan oblysy TJD Órt sóndirý jáne avariialyq-qutqarý jumystary qyzmeti Sairam aýdanynyń № 6 órt sóndirý bóliminiń bólimshe komandiri bolyp eńbek etken.
Bekjan Baldanov Taiynsha qalasyna 1 sáýirde Túrkistan oblysynyń kúshteri men quraldary tobynyń quramynda sý tasqynyna qarsy is-sharalardy ótkizýge kómek kórsetý úshin keldi. Sol kúni keshke ózin nashar sezinip, keiin aýrýhanaǵa túsken. Petropavldaǵy aýrýhanaǵa jatqyzý úshin sanaviatsiiamen jetkizilmek bolǵan.
«Tótenshe jaǵdailar ministrligi, Tótenshe jaǵdailar departamenti jáne Soltústik Qazaqstan oblysynyń ákimdigi komandirdiń mezgilsiz qaitys bolýyna bailanysty týystary men jaqyndaryna, áriptesterine qaiǵyryp kóńil aitady», - delingen habarlamada.
